Tilbyr fjerde og femte vaksinedose
Gjeld alle over 80 år og dei alvorleg immunsupprimerte.
Alle personar over 80 år kan no få 4. vaksinedose, dersom dei sjølve ønskjer det og ikkje har hatt korona etter 3. dose, opplyser Bjørnafjorden kommune
Det må gå minimum 4 månader mellom 3. og 4. dose. Fjerde vaksinedose kan du ta på apotek eller legekontor.
Kommunen viser til at Folkehelseinstituttet (FHI) trur at effekten av ein oppfriskingsdose no vil vera mindre i Noreg enn i andre land med meir smitte, men vil likevel tilby ein slik dose til dei over 80 år.
- Ifølgje VG sin oversikt er det 29 nye smittetilfelle i Bjørnafjorden kommune dei siste 14 dagane.
FHI understrekar at ein vaksinedose no ikkje nødvendigvis utelukkar behov for yttarlegare oppfriskingsdose til hausten, når dei ventar at smitten vil auka hos oss.
Femte dose til alvorleg immunsupprimerte
Fjerde dose har så langt berre vore eit tilbod til personar med immunsupprimert tilstand. FHI opnar no for at alvorleg immunsupprimerte pasientar som har fått 4. dose, skal få ein 5. dose.
Pasienten kan ta vaksinen hos fastlegen sin eller ved Moberg legesenter og Eikelandsosen legekontor, då med dokumentasjon på vaksinasjonsbehovet frå fastlegen.
