Svoltne sangsvaner
– Fleire av svanene kjem til å døy om ikkje dei blir fôra, seier naturfotograf Oddmund Lunde om svanene i Lysefjorden.
Medan knoppsvanene som bur ved Oselvo ser ut til å klara seg bra er sangsvanene, som er trekkfuglar og gjestar i Lysefjorden for tida, kanskje meir svoltne.
– No når det er frose på dei fleste vatn, til og sjøen er frosen, er det ikkje så mange plassar igjen der sangsvanene kan opphalda seg, seier naturfotograf Oddmund Lunde.
Vinteren 2010 henta brannvesenet fire daude svaner på nokre få dagar i mars.
Ifølgje Norsk Ornitologisk Forening blei sangsvane-bestanden i Hordaland halvert frå 2006 til 2011.
– Det er så kaldt no at svanene, som er ganske mange, er heilt avhengige av å få mat av menneske for å overleva. Medan knoppsvanene er ganske vant med folk er sangsvanene meir sky. Likevel kom dei symjande mot meg då eg var og fotograferte dei, dei er svoltne og har tydelegvis fått mat hos dyrevenar i Lysefjorden.
Er brød OK svanemat?
Fôring av svaner om vinteren er ikkje uvanleg.
I 2010 dreiv Statens Naturoppsyn med systematisk fôring av sangsvaner på Jæren.
– Det er delte meiningar om brød, men eg meiner det skal vera greit, seier Lunde.
Ifølgje NRK.no var det nettopp brød Statens Naturoppsyn gav svanene.
Her kan du lesa meir om sangsvaner.
Vil du sjå fleire naturfoto kan du følgja med på bloggen til Oddmund Lunde og kona Liv-Randi Lind, lind-lunde.no.