Stor interesse og god progresjon
«Skulptur i landskap» vert avslutta på søndag - sjå bilde frå symposiet og salsutstillinga.
Bildeserie:
Denne veka går del to av årets skulptursymposium føre seg i Vognhallen.
Les òg: Feirar 20 år - lager 2 skulptursymposium i sommar
Der kunstnarane i hovudsak jobba i marmor og tre i det fyrste symposiet, er det rullestein av granitt som er materiale denne veka.
På søndag samla dei 11 kuntnarane seg på lageret til Galleri Solbakkestova på Grindavoll for å plukka ut stein dei skulle jobba med.
Stor interesse og tett med folk
På onsdag opna ei eiga salsutstilling med ferdige verk som kunstnarane har med seg.
Vidar Bratlund-Mæland frå Galleri Solbakken fortel om godt oppmøte på opninga.
– Det vart etterkvart tett med folk i lokalet, og er tydeleg at folk er interesserte i kva kunstnarane hadde med seg.
Mæland fortel at salsutstillinga vil vera open for publikum fram til laurdag ettermiddag.
– Det er berre til å ta turen innom og helsa på kunstnarane som no er i arbeid, og samstundes få med deg utstillinga.
Grand finale på sundag
Mæland fortel om god progresjon og god stemning blant kunstnarane;
– Det vert jobba bra hos alle, men det vert òg tid til sosial tid saman. Mellom anna et vi middag saman kvar einaste dag.
På søndag vert granitt-veka avslutta med loddtrekning av dei 11 ulike kunstverka som har blitt forma.
G.C. Rieberfonda, som er houvudsponsor for symposiet, har bestemt at kunstverka skal fordelast ut til ulike dugnadsgjengar rundt i fylket, og Mæland ser fram til sundagens grand finale;
– Det vert spanande å sjå kven som får kva - I namnet «Skulptur i landskap» ligg jo føringane allereie - planen er at all kunsten skal ut i naturen, fordelt på 11 ulike stadar i fylket.