Ein runde til med stein
Skulptursymposiet held fram - no skal det jobbast i granitt.
Bildeserie:
Knappe tre veker etter at det tjande skulptursymposiet vart avslutta med loddtrekning, er det no duka på for eit lite bonus-symposium.
Symposiet har fått namnet «Os granittsymposium - Skulptur i landskap».
– G. C. Rieberfonda ønskte å gje noko tilbake til dugnadsgjengane rundt i fylket, og dei har no gått inn og støtta dette symposiet.
Dette fortel Vidar Bratlund-Mæland. Saman med far, Arne, og Knut Hetleflåt skal dei vera dei lokale alibia under symposiet.
– Alle skulpturane skal ut til ulike dugnadsgjengar - og lag som gjer mykje for fellesskapet, og kven som får kva vert avgjort med loddtrekning på sundag.
Plukka stein
I går var dei fleste kunstnarane samla på lageret til Galleri Solbakken på Storum. Der fekk dei moglegheita til å plukka ut steinen dei skal jobba med dei neste 5-6 dagane.
Steinen dei jobba med er hovudsakleg granitt som kjem frå Jæren, seier Bratlund Mæland.
I dag tidleg starta dei totalt 11 kunstnarane å jobba fram det som på sundag skal plasserast ut på ulike stadar i Hordaland.
– Det er som alltid kjekt om folk stikk innom og helsar på kunstnarane, seier Bratlund Mæland, og på onsdag ettermiddag vil det òg vera ei lita salsutstilling av kunst som dei ulike kunstnarane har med seg.
Desse deltek i runde to av skulptursymposiet:
Jo Klay, Tyskland
Cagdas Sari, Tyrkia
Elena Saracino, Italia
Petre Petrov, Bulgaria
Gissella Garcia, Uruguay
Aurél Boussin, Frankrike
Renate Verbrygge, New Zealand
Karen Van Ommeren, Holland
Knut Hetleflåt, Noreg
Arne Mæland, Noreg
Vidar Bratlund Mæland, Noreg