Stadion Sport blir nesten dobbelt så stor

Butikken som i mars i år skifta namn frå Sport 1 Os til Stadion Sport Os skal få nytt og større lokale.

Sportsbutikken blir verande i Amfi Os, men flyttar i oktober frå andre etasje ned i lokalet Wallendahl er i ferd med å flytta ut av.

Storleiken aukar frå 310 i dag til 580 kvadratmeter i nytt lokale i første etasje.

God utvikling

Butikken har auka jamt sidan oppstart i 2011. I 2015 blei det brutto omsetnad på 12,5 millionar kroner og eit driftsoverskot på rett over 700.000 kroner.

– Vi har hatt ønskje om å utvida ei stund og eg er glad vi klarte å sikra oss dette lokalet. Vi har hatt det veldig bra der vi er, og er ikkje så opptatt av etasje, men treng rett og slett større plass, seier innehavar Erik Rosendahl.

– Tekstil og sko er dei viktigaste varegruppene våre, Norrøna, Bergans, Rab, Nike og La Sportiva er blant dei merkene vi sel mest av.

Hightechmerket Pategonia, blant anna kjent for «ikkje kjøp denne jakken»-annonsen i New York Times, er nytt merke hos Stadion Sport denne hausten.

Større utval av same varegrupper

Rosendahl seier det ikkje er ambisjonar om å prøva seg på nye varegrupper i større lokale, men å styrka det dei allereie er gode på.

– Det blir større utval, samtidig gler eg meg til å få plass til å visa varene våre betre, seier butikksjef Maria Steien (bildet).

Butikken i andre etasje held ope fram til og med siste laurdagen før nyopning i nytt lokale torsdag 20. oktober.