Speler med Endresen i kveld
Gårsdagens storkonsert med Ingrid Bjørnov blir følgt opp med Jumping for Joy med Tor Endresen i kveld. På scenen står blant andre eit ektepar frå Os.
Torsdag var det full sal på konsert med Ingrid Bjørnov i Oseana. I kveld er cirka 2/3 av billettane selt til Tor Endresen sin releasekonsert for storband-albumet Jumping for Joy.
– Onsdag spelte vi den eine av dei fire releasekonsertane for fullsett Logen Teater. Det var knallgøy, synes Geir Mildestveit.
Dei to andre releasekonsertane går på Austlandet.
Saman med blant andre kona Bente Hage speler Geir i Sjøforsvarets Musikkorps, som utgjer storbandet til Endresen under konsertane.
Mildestveit speler bassklarinett, Hage speler obo. Til saman er det 35 musikarar på scenen i Oseana i kveld.
Musikken er skriven av Per Sælemyr og blir gjennomført i rein croonerstil.
Eleganse og morosame historiar
– Frank Sinatra, Nat King Cole og Bing Crosby er fine referansar, og Tor er ein fantastisk entertainer.
– Han drar på med gode og morosame fortellingar mellom låtane. I Bergen var det også snev av Ausekarane-stemning, då Tor spurde om Bjørn Jensen var i salen.
"Så vidt" kom det frå Jensen eit stykke bak i Logen, ler Geir.
På konserten får publikum presentert den nye plata saman med nokre av Tor sine favorittar frå ”the American Songbook”.
Konserten blir ein festkveld der musikarane tar publikum med på ei musikalsk reise innom noko som kan minna om Las Vegas, stilige menn, vakre damer og ein avslappet, cool stemning.
Orkesteret er Sjøforsvarets Musikkorps med band - 35 musikere på scenen, leia av Reid Gilje.
Hoppar av glede
Gjennom ei lang karriere har Tor Endresen gleda publikum med musikk i dei fleste sjangrar. Etter mange plater, tv-program og utstrekt konsertverksemd i mange musikalske samanhenger møter du her ei anna side av Endresen.
Med deltakinga i NRK-serien Stjernekamp viste Tor nok ein gong sin kapasitet som songar og entertainer. Sjølv er han mest nøgd med storbanddelen av serien og du høyrer fort at han trivst som crooner.
No gjev han ut nyskriven musikk som varierer frå svingande storband med full trykk, til nydelege balladar med strykarar og herlege bossa novas på albumet Jumping for Joy.
All tekst og musikk er skriven av tidlegare kjøpmann Per Sælemyr. Sælemyr har alltid interessert seg for storbandmusikk og etter at han passerte 60 år byrja han å nynna på nye melodiar som han etter kvart lagde tekstar til.
Avdøde Gustav Lorentzen hjalp Per med å skriva ned melodiene og blei også Per sin personlege mentor då det kom til å skriva tekstar. Før Gustav gjekk bort formidla han kontakten mellom Tor Endresen og Per og dette resulterte i eit venskap og samarbeid som leia fram til plateinnspeling og no - konsertar.
Innspelinga er gjort i Rainbow Studio i Oslo med Stabsmusikkens Storband og nokre av Noregs fremste jazzmusikarar. Plata er arrangert og produsert av Pete Knudsen og plateselskapet er Grappa Musikkforlag.