Viste Dollie-tatovering til Bjørnov
Maria Sætre (30) har vore hekta på Dollie de Luxe sidan ho var 8 år. I går fekk ho møta halvparten av suksess-duoen frå 80- og 90-talet.
Torsdag kveld spelte Ingrid Bjørnov for fullsett sal i Oseana.
Les òg: Ståande trampeklapp for Ingrid
Etter konserten var det duka for eit rørande møte mellom Bjørnov og ein svært lojal beundrar; Maria Sætre.
– Eg fekk billett i julegåve og tok kontakt med leiinga i Oseana for å høyra om det var mogleg å møta Ingrid etter konserten, fortel Maria.
Maria er frå Bergen, men bur i Os.
– Eg har vore hekta på Dollie sidan eg var 8 år. 20-årsjubileet mitt som Dollie-fan blei markert med tatovering av Wich Witch-logoen.
– No blei eg rørt!
Ingrid Bjørnov og Benedicte Adrian selte 52.000 eksemplar og fekk Spellemannsprisen for debutalbumet Første Akt i 1980. Dueon heitte Dollie i starten, seinare Dollie de Luxe.
Deira største suksess var operamusicalen Wich Witch, sjå også singelen Queen of the Night/Satisfaction, som selte heile 250.000 eksemplar.
– Var du fan allereie frå du var 8 år, spurde Ingrid medan ho fotograferte tatoveringa til Maria.
Maria hadde også med seg gåver til Ingrid og Benedicte, to glasvaser som ho sjølv hadde dekorert med den same logoen.
– No blei eg verkeleg rørt, dette var fantastisk kjekt, sa Ingrid.
– No er eg skikkeleg skjelven, sa Maria etter at dei to gjekk kvar til sitt.
– Eg er verkeleg takksam for at Oseana tok kontakt med managementet og ordna dette for meg.