– Som ein liten festival

Det byrja i fjor, då Stig Eldred frå Los Angeles, busett i New Zealand, trengte trommis då han skulle spela i Noreg.

– Stig har norske slektningar og har vore her ein del om sommaren dei siste åra, fortel Magne.

Eldred er både musikar og skodespelar, og har hatt roller i både Dick Tracy, King Kong og i Tele 2-reklamen om "Rolling Roger". Til hausten blir han å sjå på "Sønner av Norge".

– Vi hadde ein veldig kjekk konsert saman i Oseana i fjor, med rundt 120 i salen. No har vi fått med ei rekkje fleire band og om dette er noko som slår an kan det bli ein tradisjon, ein minifestival med gamalpop og nokre andre sjangrar.

Mista kamerat - og spelelyst

Magne fortel at han har hatt ein tung sommar etter at kameraten Yngve Moe gjekk bort. Moe, som spelte saman med Magne dei seinare åra, omkom etter ei badeulykke på Tenerife i vår.

– Tapet og savnet er stort. Eg har ikkje klart å tenkja på å spela trommer i sommar. Men denne konserten har gjeve meg eit spark bak, no gler eg meg, seier Lunde.

minifestivalen blir spelt framfor flatt golv med runde bord i Oseanasalen.

Meir enn 10 innslag

Stig og Magne speler saman i Stig and his bunch of S's. "Rumpene" til Stig er Silje Marie Tveit Hansen (toradar), Sigbjørn Bull Holdhus (bass/vokal), Gisle Frydenlund (gitar/vokal) og Magne Lunde (trommer). Sjølv bidrar Eldred med song og piano.

– Med toradar med på repertoaret byrja eg å få fleire idear. Først ville eg ha med den koselege norsktopp-låta av Ove Thue, Sture den lure, men då han ikkje fann låta digitalt til oss inviterte eg Thue til Oseana.

Så fekk Lunde lyst å ha med rockeveteranane frå Young Collection i Os.

– Dei held seg overraskande godt og imponerte då dei spelte på Osøren Blues og Jazzfestival. I vår hadde vi braksuksess med Pop 60 i Bergen, og fleire band som var med der kjem også til Oseana.

Magne nemner Chigen and the Hoolegans og The Hunters frå plakaten.

Også Steve Morgan, Rhytmic Six, Sverre Faaberg og Ove Eriksen kjem for å spela nokre låtar i Os neste laurdag.

Urframføring av nykomar

Medan fleire av banda og musikarane Magne har med seg har spelt konsertar i Os og Bergen i ein mannsalder, er også eit ganske nystarta band frå Austlandet, med artistar i midten av 30-åra på plakaten.

– Eg er i slekt med Stig og veldig glad for invitasjonen, seier Olav Erik Johansen frå Alfama.

Johansen har fartstid som musikkprodusent.

Med seg til Os tar han eit av bandets fire andre medlemmar, Elliot Engeseth, som blant anna har vore programleiar for NRK Barne-TV.

– Vi speler eigekomponert materiale, på engelsk, og har faktisk med oss ei låt vi aldri har spelt for publikum før.

– Vi har spelt i Bergen nokre gongar før, men aldri i Os. Vi gler oss veldig til dette, seier Olav Erik Johansen.