Sølv til Nore Neset-jentene!
Nore Neset jenter 14 klarte ikkje å hamla opp med Klepp i år heller, men reiser heim frå Kristiansand med ein fin sølvmedalje i bagasjen.
Etter uavgjort i første innleiande kamp vann småjentelaget til Nore Neset alt fram til finalen i PlussbankCup, som blei spelt på Sør Arena onsdag formiddag.
I dag møtte dei Klepp i finalen, eit lag dei i fjor tapte 0-5 for i kvartfinalen.
– Klepp fekk eit tidleg mål og var best i starten. Vi kom litt tilbake på tampen av omgangen, men klarte ikkje å utlikna før pause, seier Jarle Heltne frå Nore Neset idrettslag.
Nore Neset hadde tre av dei betre spelarane for halv maskin grunna skade, fleire av dei spelte lite i finalen.
– Andre omgang blei tøffare for jentene våre og Klepp, som er eit veldig godt lag, vann fortent. Men vi er nøgd med å ta sølv i ein så stor cup, seier Heltne.