Siste klipp for Marie
Ho har vore frisør nesten like lenge som Terje har vore ordførar. I ettermiddag la Marie Lunde Bruarøy saksa på hylla.
Bildeserie:
I ekstraordinært kommunestyre torsdag 12. januar skal fungerande ordførar Marie Lunde Bruarøy (H) overta som permanent ordførar, og få ny varaordførar.
– Det lengste eg har vore fungerande tidlegare er berre eit par veker mens Terje har hatt ferie. Han har jo aldri vore sjuk, seier Marie om den ferske olje- og energiministeren.
I søknaden om permisjon til sin eigen arbeidsgjevar, kusina Guri Bugge, har ho formulert seg sånn i feltet for tidsperiode; «så lenge Terje er statsråd».
I dag hadde ho sin siste dag i salongen i Brugata.
– Eg hadde eigentleg time i neste veke, men framskynda til i dag så eg fekk meg ein klipp hos ordføraren før ho fôr ut i permisjon, seier kunde og nabo Sigrid Kvalvaag.
16,5 år i faget
Marie, som då var 9 år gamal, var på plass i tanta Signy og kusina Guri sin salong på opningsdagen i 1989.
Då ho i 2000 var ferdig med gymnaset gjekk det rett i lære. I forkant hadde ho vore i salongen laurdagar og ettermiddagar som ekstrahjelp nokre år.
– Eg tok det som vaksenopplæring og gjekk derfor i lære i 3,5 år før eg i 2004 tok fagbrev, fortel ordføraren.
Sidan har ho, med unntak av to rundar ute i svangerskapspermisjon, jobba samanhengande som frisør.
– Vil sakna kollegaer og kundar
Den påtroppande ordføraren ser fram til å innta rådhuset i 100 prosent stilling, men er førebudd på å ta saksa frå hylla igjen når den tid kjem.
– Eg vil sakna både kollegaer, kundar og faget.
– Men det blir ingen klipping neste år, anna enn eventuell snorklipping, som ordførar?
– Eg har sagt at eg kan hjelpa til om det er fullstendig krise, men eg får håpa dei klarer seg fint utan meg.
– Heldigvis fekk vi tilsett Stine Dyngeland, svigerinna mi, i oktober. Vi er berre oss fem, og med Guri delvis sjukmeldt og eg i permisjon, er det ikkje fleire frisørar her enn det må vera.
Marie Lunde Bruarøy blir ordførar til ut september 2017, og eventuelt vidare, om dei borgarlege held fram i regjering etter valet til hausten og Søviknes av ny statsminister blir spurd om å halda fram som statsråd.