Sakna kvinne: Ber folk sjekka hage, garasje og bod
Søket etter den sakna kvinna held fram.
I 08-tida i dag blei det oppdaga at ei kvinne var sakna frå heimen sin. Ho var sist observert klokka 02.
11.30 i dag gjekk politiet ut med informasjon om leiteaksjon.
– Vi er no 8 frå politiet og 35 frivillige som deltar i søket, seier innsatsleiar Øystein Magnussen til Midtsiden.
Dei søker i området rundt bustaden hennar i Varåsen, mot Borgafjellet, Ulvenvatnet og langs land i Os hamn.
Ekvipasjar (hund og førar) frå Norske redningshunder har søkt i terreng.
– Hundane er lært opp til å sjå etter avvik. Dei markerer på funn som skil seg frå normalen, men ikkje på turgåarar på sti, seier hundeførar Mali Sæbø.
Det er òg gjort finsøk i 300 meter radius rundt heimen hennar.
Sakna skal ha gått seg ein tur, og var ikkje heime då ektemannen vakna.
Eventuelle tips og observasjoner kan meldast til politiet på telefon 02800/112.
Den sakna kvinna er i 60-åra og cirka 180 centimeter høg. Ho er tynn og har mørkt, skulderlangt hår. Ho går truleg i støvlettar og prikkete skjørt.
– Vi har fått ein del tips, men det har foreløpig ikkje leia til noko funn.
Politiet oppfordrar no folk å leita i eigne hagar, garasjar og bodar.