Røde Kors overtar drift og registrering av hjartestartarar
I oktober viste det seg at 86 av 139 hjartestartarar i Os sto oppført som inaktive. No tar Røde Kors tak.
Hjartestartarar i Os har redda liv fleire gongar. Men under halvparten av dei oppunder 200 som har kome på plass dei siste 10-15 åra er registrerte i offentleg kart. Nokre av dei kan òg vera ubrukelege.
Os Røde Kors har, på eige initiativ, overtatt ansvaret for registrering av hjartestartarane i Os sånn at kart og liste blir oppdatert.
– Det starta med at kundetorget på rådhuset kontakta oss, då det byrja å pipa i den som var på veggen. Batteriet ebba ut, og vi kom ned for å skifta. Då nemnte eg saka frå oktober, seier Kristian Strønen.
Han er styremedlem i Os Røde Kors, og hadde i dag med seg kollega og beredskapsansvarleg i Os Røde Kors, Gry Offernes, til rådhuset for å signera driftsavtale.
Os Røde Kors skal kontrollera, men kommunen slepp å honorera. Dei frivillige kreftene tar oppdraget vederlagsfritt.
Det er ikkje berre i tråd med politisk posisjon sine ambisjonar.
– Det er til store glede for både oss og innbyggarane at vi får denne forma for løft i samfunnsberedskapen, seier fungerande ordførar Marie Lunde Bruarøy.
Strønen og Offernes anslår at det er rundt 190 hjartestartarar i Os som er meir eller mindre tilgjengelege for ålmenta.
– I tillegg kjem dei som privatpersonar eller større bedrifter har kjøpt inn til seg og sine, utan å registrera dei i offentleg register.
Hjartestartarane dei no skal kartlegga, sjekka og registrera er dei som er tilgjengelege døgnet rundt.
– Vi tar dei som er på døgnopne plassar eller utandørs. Derfor er også denne i kundetorget flytta frå innsida og ut, seier Offernes.
– Det er fleire utandørs i Os sentrum, dessverre har ikkje alle fått henga i fred. Eg håper det endrar seg, at det blir heilt slutt på tjuveri og hærverk av desse potensielt livsviktige apparata, legg Bruarøy til.
- I morgon, fredag, registeret epost til lag og organisasjonar som står oppførte som eigar av hjartestartarar.
– Eg håper alle følgjer med. Dei som ikkje får epost fredag, eller har spørsmål, kan kontakta oss på ei eigenoppretta epostadresse, hjertestarter@osrodekors.no, seier Offernes.
Ho legg til at ho håper at dei som har hjartestartar innandørs vil vurdera å henga denne ut. I så fall treng den ein eigna boks, som held temperaturen oppe rundt apparatet.
Brennande behov
Onsdag 16. oktober var den internasjonale hjarte- og lungeredningsdagen.
Same dag publiserte Midtsiden eit intervju med Os Røde Kors, som viste til tal som fortel om svikt.
86 av 139, altså 62 prosent av hjartesartarane i kommunen, står oppført inaktive – og er dermed tatt ut av kartet.
Årsak: Manglande svar på epost.
– Dette kan vera fullt brukande hjartestartarar, batteria kan vara i 4 til 8 år. Men dei som styrer registeret sender ut epost kvar sjette månad. Om ikkje dei får svar på at hjartestartaren framleis er på adressa, blir den notert som inaktiv, forklarer Kristian Strønen frå Os Røde Kors.
– Så no hentar kommunen inn ein frivillig rødekorsveteran frå Strøno fordi rådhuset ikkje klarer å svara på epost?
– He, he, det kan du seia. Men det går an å forstå at dette skjer.
– Kommune, lag og organisasjonar kan ha rullert på oppgåvene, tilsette eller styresamansetting, og epost går dermed til feil person – eller ei adresse som ikkje lenger er i drift. Då stoppar det opp.
Det kan avtroppande kontorsjef i Bjørnafjorden kommune, Andris Hamre, stadfesta.
Han gjorde sjølv, då han jobba som journalist i Midtsiden, eit stykke arbeid med å lista opp det som i 2011 (og oppdatert i fleire omgangar) hjartestartarane som var i Os den gong. Før sentralt registert kom på plass.
Oversikta over kor hjartestartarane er, finn du i Hjertestarterregisteret (hjertestarterregister.113.no) og i appen «Hjelp 113», som du gratis kan lasta ned på telefonen din.
Korrekt hjarte- og lungeredning åleine er ofte ikkje nok. For å få tilbake normal hjarterytme trengs ofte ein hjartestartar. Dess raskare det skjer, dess større sjanse for å redda liv.
– Det er høg aktivitet i Os Røde Kors. I år har vi hatt 19 livreddarkurs for blant anna bedrifter og offentleg tilsette, med til saman 319 deltakarar, fortel kursansvarleg Kristian Strønen.
