Paskalev trollbatt publikum
Urørt-vinnar Michael Paskalev hadde full kontroll på Søfteland fredag kveld.
Bildeserie:
Søfteland Rock N LOL mangla noko i går; dødtid; konsertar der det var glisent framfor scenen – periodar der publikum prioriterte noko anna.
Frå starten med KingCalling var det folksamt og god stemning, og det heldt fram både på hovudscenen og i teltet.
Les òg: Kongestart på Søfteland
Men det var kanskje éin som fanga publikum endå betre enn andre, som tok Søfteland opp og ned igjen med same tette kontakt med alle framfor scenen; Michael Paskalev.
Paskalev vann årets Urørt-finale og hamna på førsteplass på lista over nye artistar bransjen har tru på dette året.
I år kjem han med debutalbumet sitt, men har allereie rekt å spela både på Øyafestivalen, Slottfjellfestivalen, By:Larm i 2011, Hove i 2012, Eurosonic i Nederland som NRK P3s spesielt utvalte artist, Lydverket, Lindmo og Sommeråpent på NRK, og på Frankrikes største musikk-TV-show Taratata i 2013.
Hardt og folkeleg
Overgangen var brå til hysterisk hardcore med Blood Command i teltet. Bandet, som tidlegare hadde osingane i Maheads som sitt faste LIVE-akkompagnement, kom tilbake og kjørte eit fullstappa telt hardt og lenge før Real Ones runda av kvelden på hovudscenen.
Tonane av Real Ones sin folk-rock såg ut til å nå heilt ned til Drus Kæmp, der folk kom i flokk opp mot scenen for å få med seg bergensbandet, som blei stifta midt på 90-talet, då artistane var 14-15 år gamle.
Real Ones, som også speler på familiefestivalen i dag, består av Ivar Vogt, Jørgen Sandvik, Kåre Opheim, Øystein Skjælaaen og David Vogt.