Kongestart på Søfteland
Rock N LOL: KingCalling gav effekten arrangørane håpa på - og serverte ein dobbel trommesolo med Kjetil Osablod Grønvigh og Eirik Søfteland side om side - SJÅ VIDEO!
Bildeserie:
Fredag klokka 18 starta det som er siste kapittel med Søfteland Rock N LOL. Brørne Lindborg hadde sett KingCalling opp til å opna festen, og det populære bandet med frontfigur Eirik Søfteland skapte effekten dei hadde håpa på; folksamt framfor scenen frå første stund.
KingCalling leverte frå start, serverte Shadow Throne, som vi har sett musikkvideoen av som låt nummer to og gav oss ei ny låt med arbeidstittel Sinnataggen (dedisert til Espen Hjertaas).
Men heftigaste del var kanskje den doble trommesoloen på låta Voice of 1000 Lies – då Eirik sette seg ned ved eige slagverk og hamra laus saman med Kjetil Osablod Grønvigh.
SJÅ VIDEO NEDST I ARTIKKELEN
– Helvete for eit show dei held, dei der KingCalling, altså! var ein av Eirik sine kvikke replikkar frå scenen.
– Å setja Eirik ned bak trommene blei ein liten link til Idol, sjølv om dette er KingCalling sin kveld. Vi har øvd det inn på eitt trommesett, så eg var spent på korleis det kom til å gå, seier Kjetil.
Stjerneskot frå Samnanger
Etter den kongelege opninga på hovudscenen var det tid for første konsert på teltscenen – også den meir folksam enn kva vi har sett før så tidleg på kvelden.
Eggstock-vinnar Fröder måtte avlysa på Søfteland, og Second Circuit, som også var i Eggstock-finalen, overtok plassen.
"Dei dominerte rett og slett totalt, og samtlige publikummere skrek og kikket på hverandre i forvirring. Hvordan kan noen så unge være så gode? Juryen var enig, disse fortjente virkelig en plass i finalen" fortel Eggstock-juryen.
Bandet består av dei talentfulle ungdomsskuleelevane Magnus Magnussen (vokal, gitar), Håvard Loe (bass) og Vegard Lemme (trommer) frå Samanger.
Dei vann The Battle of Bjørnefjorden i fjor, utmerkte seg på Eggstock og hausta mykje ros på Søfteland. Tøffe låtar og tøffe gutar, som fødd til å stå på scenen på Rock N LOL, eit flott samantreff at vi fekk oppleva dei der på det som er den siste festivalen.
– Vi blei kjempeglad då vi blei invitert og det var dritfett å spela. Teltet blei jo fullt med ein gang og stemninga var noko heilt anna enn kva vi er vant med, seier trommis Vegard Lemme til Midtsiden etter konserten.
Etter dei to lokale banda blei det eit populært gjensyn med dei livlege bergensarane i Major Parkinson på hovudscenen - og ein knallhard runde med punkrockbandet The Good, The Bad and The Zugly i teltet.
Midtsiden kjem med meir om resten av kvelden i eigen sak.
Her kan du sjå video av Kjetil og Eirik i KingCalling sin nesten to minutt lange trommesolo (Foto: Kjetil Vasby Bruarøy):