Overraskande stort engasjement

Ved årsskiftet blei det kjent at Oseana og Færingen hadde avslutta samarbeidet rett før jul. Etter det har ei arbeidsgruppe jobba intens for å meisla ut eit nytt serveringskonsept i kunst- og kultursenteret.

- Vi treng framleis noko tid på å bestemma oss, men om vi klarar å helde tidsplanen vil vi vera oppe og gå igjen frå rundt påsketider, fortel styreleiar Terje Søviknes.

Framleis mogleg å melda seg

Styret jobbar etter to forskjellege spor.

1. Driva serveringa i eigen regi.
2. Oppretta ei ny samarbeidsavtale med ein restaurantør som vil ha Oseana som base.

- Mange har teke kontakt, men vi er framleis interressert i å koma i kontakt med kokkar/kjøkkensjefar som vil jobba for oss om vi vel å driva det sjølv eller restaurantørar som kan tenkje seg å driva i Oseana.

Fått mange innspel

Styreleiaren er imponert og litt overraska over det store engasjementet han har opplevd etter at det blei kjent at samarbeidet med Færingen var avslutta.

- Det er mange folk i bransjen som har teke kontakt for å kome med innspel.

- Du har jo òg gått ut på facebook-sida di og oppmoda om innspel.

- Ja, og også der har engasjementet vore stort.

- Det er tydeleg at mange er opptekne av serveringa i Oseana, men meiningane om kva som bør kom er like varierte som antalet innspel.

- Om det blir det eine eller andre avhengar litt av kva konsept vi til slutt fell ned på.

Vil sjå på lokalet

Ein fellesnemnar for mange av innspela som har kome frå publikum har gått på sjølve lokalet og at ein sit litt på utstilling for dei som til dømes er på ei framsyning og skal på toalettet.

- Det med lokala er ein av tinga vi ser på for å sjå om det er mogleg å skapa ei anna atmosfære.

- Ønskje om å få det meir intimt og noko meir avskjerma er blant det vi tek med oss i vurderingane, forsikrar styreleiaren.