Nye stunt på Catten
Brettspel, bad taste-party, afterski (!) og – frå i kveld – karaoke, er blant dei nye aktivitetane på Catten Nighclub.
For rundt eit år sidan blei shuffleborda på Catten erstatta med pianobar.
– Vi held fram med pianobar, men har no annakvar helg med pianist og trubadur/DJ. Det var smikkfullt i livebaren då Jens Aasmundseth stilte som trubadur laurdag, fortel innehavar Bjarte Andersen.
No får livebaren eit nytt tilskot, annakvar fredag, med start i kveld, er det karaoke på Catten. Dette har dei berre prøvd éin gong før, i 2012.
– Eg har inntrykk av at det er mange musikarar i Os, og at jam har vore populært fleire stadar. Men det er nok også mange gode stemmer i bygda, frå amatør til proff, så eg håper å høyra nokre av desse om fredagane framover.
Populært å kle seg ut
Seinare i februar skal Catten ha afterski, i mars står bad taste-party på programmet.
– Enten folk kommer rett fra ski eller tar på seg skibuksa heime er det kjekt om gjestane er med å skapa afterski-atmosfære her.
– Bad taste-party arrangerer vi for tredje år på rad. Å kle seg ut skaper ekstra stemning, det ser vi òg på halloween-festane vi har hatt dei siste åra.
Kebab og sjakk
Dei siste månadane har nattklubben òg hatt nokre nye tilbod torsdagar og fredagar.
Den populære torsdagsquizen er supplert med ein meny frå Capri.
– Dette samarbeidet med Capri har fungert veldig bra. Torsdag etter quizen og fredag har vi spelekveld, der gjestane kan leiga spel som sjakk, Alias og Geni. Torsdagen kan dei òg bestilla mat frå Capri, som kjem og leverer rett på bordet inne hos oss.
– Fleire av dei nye tilboda har kome etter forslag eller idear frå gjestar. Vi er glade for at dei er med på å forma ein plass med mangfald, seier Bjarte Andersen.
Les òg: Populær øl-kveld på Catten