Nye rundar med manuell dirigering
Legg nytt dekke dei to neste vekene.
Måndag kveld starta fresinga av asfalt i Mobergsbakken, arbeidet held fram på Byvegen fram til seinast laurdag morgon.
Både Mobergsbakken og Byvegen har vore opne mens arbeidet har pågått, men med manuell dirigering.
I dag opplyser kommunen at neste steg, asfalteringa, skjer over tre kveldar og netter i neste veke og to kveldar og netter veka etter.
– Tysdag 7. juni, onsdag 8. juni og torsdag 9. juni skal fylkeskommunen asfaltera vegen frå Osøyro til Moberg. Måndag 13. juni og tysdag 14. juni er det asfaltering frå Osøyro til Uno X, opplyser kommunen.
Arbeidet vil vera på kveldane frå klokka 21 gjennom natta til klokka 05 neste morgon.
Vegane blir ikkje stengde, det er manuell dirigering mens asfalten blir lagt.
Nytt dekke tre stadar
Vestland fylkeskommune opplyste i starten på april at dei skal legga 217.667 meter med nytt asfaltdekke på eige fylkesvegnett i år.
Av 217,6 kilometer kjem 5,7 km i Bjørnafjorden kommune.
Desse tre vegstykka i Bjørnafjorden skal få nytt dekke i år:
- FV583 frå rundkøyring ved Industrivegen til Os sentrum: 2.546 meter
- FV552 frå Moberg til Os sentrum: 1.544 meter
- FV552 på Venjaneset: 1.610 meter
– Både Mobergsbakken og Byvegen opp til Industrivegen skal takast i denne runden.
