Ny sjef i sjøkanten

Ekteparet Anne Rita og Roald Mjelstda, som med selskapet Bergen Restaurantkantine AS, frå i vår har drive kafé og restaurant i Oseana, har tilsett dagleg leiar.

Les òg: – Ein ny vår

– Vi har i tillegg til restauranten i Oseana kantiner og eigedom å sysla med, så vi ville ha ein leiar som har arbeidsdagane sine i Oseana, seier Roald Mjelstad.

Ernst-Petter Hansen fekk jobben og starta som dagleg leiar i Oseana Kafé og Restaurant tidleg i juni.

God erfaring

Hansen har erfaring som blant anna restaurantsjef på Fløyen og sjef for catering i Grieghallen.

– Han har jobba for meg tidlegare og, eg hadde Ernst-Petter som restaurantsjef då eg dreiv Hansaparken, fortel Roald.

Han gjekk frå stillinga som personalansvarleg i eit større kantineselskap då han byrja i Oseana.

– Hyggelege gjestar og fantastiske omgjevnadar

– Det var huset, plassen og utsikta som var avgjerande for at eg takka ja til stillinga, fortel Ernst-Petter.

– Og eg har hatt ein veldig kjekk start, eg er overraska over kor mange fine tilbakemeldingar vi får, og kor mange godt vaksne osingar som går ut og et på kafé og restaurant.

Ulike gjestar - ulike rettar

Oseana Kafé og Restaurant har kafé på dagtid, restaurant på kvelden fredagar og laurdagar, og servering av gjestar på konferanse og møte utanom.

– Noko anna som har overraska meg er responsen på søndagsbuffet, då har vi ofte over 100 gjestar her.

Førebels har han ikkje sett sitt personlege preg på menyen.

– Vi satsar å heimelaga mat og prøver å ha noko kortreist på menyen, men vi er ikkje fanatiske. Det viktigaste er at vi har det dei ulike typane gjestar ønskjer, seier den nye sjefen ved sjøkanten på Mobergsneset.