Ny dobbelhall ferdig om ei veke

I august skal ny dobbelhall leverast frå Consto Bergen AS til Os kommune.

Consto jobbar med å bli ferdig før ferien, og no er det lite som gjenstår.

– I dag er det montering av spilesystem for å oppnå god akustikk i hallen, i tillegg har vi starta utvask, fortel prosjektingeniør Christoffer Helland frå Consto.

Ferdig, men ikkje klar for bruk

Målet er å bli heilt ferdig i løpet av neste veke. Det som gjenstår er blant anna asfalt utandørs rundt bygget og ned til parkeringskjellaren.

– Hallen skal ikkje brukast i sommar, vi må venta til etter overtaking i august. Teknisk testing starta for nokre veker sidan og vil pågå gjennom sommaren, fortel prosjektsjef i Os kommune, Halvor Hanevik.

Simulert dagslys

Den nye foajeen er utan den store vindaugeflata som den førre hadde, men prøver å henta inn noko som liknar dagslys med eigne spesiallampar i taket.

Tre lysfelt, kvart med 4 transparente godvêrsflater som erstattar for himlingsplater, er justerbare etter døgnets timar og skal gje ein sine dosar med noko som liknar dagslys inn i foajeen.

Osbadet får mykje nytt

Når hallen er overlevert blir òg nytt inngangsparti og ny foajé tatt i bruk.

– Skal foajeen stå med skiljevegg mellom ny og gamal del gjennom sommaren?

– Vanlegvis blir ikkje nytt areal tatt i bruk før overtaking, men dette blir opp til byggherre å svara på, seier Helland.

Midtsiden har ikkje fått tak i prosjektleiar på staden, Ole Håkon Sælen frå Os kommune, men dagleg leiar i Osbadet KF, Torbjørn Brattabø, fortel om arbeid med innreiing gjennom sommaren.

– Vi har fått hjelp til å planlegga og teikna ny resepsjon, kafé og butikk. Snikkarane byrjar i midten av juli og arbeidet skal vera ferdig før skulestart.

Osbadet har lagt vekt på å få ein resepsjon som er vendt meir mot gjestane, både dei som skal i badet og dei som skal bruka dei tre hallane.

– Vi har stort utval i badeutstyr og klede, og får vist varene endå betre i komande, ny badebutikk. Det blir langt fleire sitjeplassar, nesten dobbelt så mange som i dag.

– I tillegg har vi bestilt eit smykke av ein spesialdesigna, 11 meter lang benk. Denne blir god å ha når skuleklassar eller andre grupper som besøker oss skal venta på å sleppa til i badet eller i hallen, eller venter på å samlast før heimreise med buss.

– Blir menyen påverka av at huset no rommar langt fleire enn før, og av at de har fått utvida areal til servering?

– Ja. Vi kjem til å prøva oss litt fram utover hausten, men med fleire hallar og fleire gjestar gjennom dagen er det kanskje marknad for både nye varer og varegrupper vi tidlegare har hatt i utvalet, men som har blitt selt i for lite volum. For eksempel frukt, seier Brattabø.

• Les òg: På innsida av dobbelhallen (april 2018)

Innhald

Bygget er på rundt 54 x 53 meter i grunnflate (2900 kvm), integrert i dagens foajé til Oshallen og Osbadet.

Parkeringskjellaren får 95-100 plassar. Dette er vesentleg meir enn parkeringsplassen som blei ofra for å få plass til bygget. I tillegg kjem 30 nye parkeringsplassar utandørs.

Innhaldet i hallen, over parkeringskjellaren er:

1. etasje
• Nytt inngangsparti med stor foajé
• To fullskala handballhallar til fleirebruk, begge kan delast i tre med skiljevegg
• 6 garderobar (3 herre, 3 dame) med toalett og dusj
• 2 dommargarderobar
• 2 lager (45 og 105 kvm)

2. etasje
• Tribune på 143 kvm
• Teknisk rom 73 kvm
• 4 disponible rom (65, 124, 142 og 222 kvm)