På innsida av dobbelhallen
Bildeserie: Tysdag etter påske var malarane i gang. Snart skal det leggast golv i fleire veker.
Bildeserie:
Måndag 19. februar var det kranselag på Kuventræ, etter markeringa har alt av innerveggar kome opp.
– No er det enklare å danna seg eit bilde av korleis hallen med tilhørande fasilitetar kjem til å sjå ut, seier prosjektingeniør Christoffer Helland frå Consto Bergen.
Første dag etter påske byrja malarane, no går det slag i slag med spartelskei og malarkost gjennom dei åtte nye garderobane.
Skal få fleire vindauge
I den doble hallen er taket ferdig. Veggane ser ferdige ut, men dei skal få fleire hol.
– I sjølve hallen skal det ikkje sleppa dagslys inn, her må lyset vera av rett styrke og farge, og jamt i heile hallen.
– Men ytterveggane, der det er andre rom innanfor, skal få fleire vindauge. Hola vil vi ikkje laga før vindauge og dører står klare til å puttast i. Sjølv om vinteren har sleppt taket ønskjer vi å halda mest mogleg på den varmen vi får frå dei store omnane.
Ein stor jobb med nytt golv
Om ikkje så lenge byrjar arbeidet med å legga golvet.
– Eg driv i desse dagar å avtalar med golvleggarane, kor lang tid dei får på seg. Vi har litt ulike forventingar, men eg reknar med vi landar på 15-20 dagar. Golvet skal leggast i tre omgangar, så skal ulike banar malast på.
På førehand må det støypte golvet vera både tørt og veldig jamt.
– Det er strenge krav til denne forma for flate. Det blei støypt nesten perfekt, men må ta litt finpuss før alt er klart for neste trinn.
Tribune på kortsidene
Alle dei nye garderobane har direkte tilkomst i plan med speleflata i hallen. Tribunen i etasjen over er på kortsida av speleflatene.
Det betyr at du blir sitjande bak mål når du skal å heia på handballkampar i hallen.
• Les òg: Kven skal trena i den nye hallen
Det skal mange andre aktivitetar i hallen, og det har vore diskutert å innføra klisterfobod. I så fall blir frå 15-16-åringar til seniorhandball utelukkande i gamle Oshallen.
Hallen skal stå ferdig til skulestart i august, men både byggherre Os kommune og hovudentreprenør Consto Bergen har sagt overlevering i juni.
– Vi har som mål å bli ferdige til sommarferien. Det blir nok ein og annan tur opp her etter overlevering, å unngå enkelte reklamasjonar er vanskeleg.
Innhald
Bygget, som er på rundt 54 x 53 meter i grunnflate (2900 kvm), integrert i dagens foajé til Oshallen og Osbadet, får parkeringskjellar med 95-100 plassar. Dette er vesentleg meir enn parkeringsplassen som blei ofra for å få plass til bygget.
I tillegg kjem 30 nye parkeringsplassar utandørs.
Innhaldet i hallen, over parkeringskjellaren er:
1. etasje
• Nytt inngangsparti med stor foajé
• To fullskala handballhallar til fleirebruk, begge kan delast i tre med skiljevegg
• 6 garderobar (3 herre, 3 dame) med toalett og dusj
• 2 dommargarderobar
• 2 lager (45 og 105 kvm)
2. etasje
• Tribune på 143 kvm
• Teknisk rom 73 kvm
• 4 disponible rom (65, 124, 142 og 222 kvm)