Nok ein siger til damelaget
Fekk ei langdryg reise til Voss, men reiste heim med tre poeng.
I førre runde vann Os over Sotra, som låg hakket over Os på vårtabellen.
I går reiste dei til Voss for å møta laget som låg hakket bak.
– Det var mykje vegarbeid, så vi brukte veldig lang tid og kom fram 35 minutt før kampstart. Vi fekk utsett avspark ti minutt, og så gjekk jentene ut og gjorde jobben, seier trenar Ørjan Sandal.
Tiril Søreide Solberg gjorde eit godt arbeid med å jaga keeper, vann duellen og sørgja for at Andrine Brunvatne Kvittingen fekk avslutta.
Os leia 0-1 til pause. Heimelaget utlikna, men ein soloprestasjon av Kvittingen i 75. minutt sendte gjestane frå Os opp i 1-2, som òg blei sluttresultatet.
– Det var ikkje eit fyrverkeri, sånn kampen mot Sotra var, men ei grei gjennomføring på tampen av ein lang dag, oppsummerer Sandal.
Os skal spela 14 kampar i haust. Etter fire rundar står dei med tre sigrar og ein uavgjort, og toppar hausttabellen.
Neste kamp går heime mot Bjarg mens mange sit spent og ventar på valresultatet måndag 11. september.
- Tabell og terminliste på fotball.no
