– Ho er livsfarleg på corner
Os med «vidunderleg» siger over sterke Sotra.
Os tok fredag imot Sotra, som tok 2 poeng meir enn Os i vår, og slo Stord 5-1 i førre kamp.
– Dette var i grunnen ein kamp vi ikkje skulle vinna. Vi ønskjer å vinna alle, men var innstilte på at her skulle vi våga å spela vårt spel trass sterk motstand, fortel trenar Ørjan Sandal.
– Og så lykkast jentene så godt! Det er ikkje berre det at vi vann, det var heilt vidunderleg spel, spesielt i første omgang!
Os - Sotra 3-1 (2-0)
Lenea Hjelle Fløysand sendte Os i leiinga på corner av Karoline Østgulen Hevrøy.
– Lenea er livsfarleg på corner! meiner Sandal.
Vy Nguyen auka til 2-0 før pause.
Sotra måtte flytta spelarane sine opp for å ha sjanse til å ta poeng, men det var likevel Os som skåra først i andre omgang.
Karoline Østgulen Hevrøy, som skåra to mål frå 40 meter i førre heimekamp, auka til 3-0 på nok eit fint langskot.
Gjestane reduserte minuttet etter, men 3-1 sto seg kampen ut.
Tett program
Os spelte 1-1 borte mot Bremnes måndag. I alt har dei no 4 kampar på 15 dagar. den neste borte førstkomande onsdag, så er det heime måndag om ei god veke.
Toppar tabellen
Vår-avdelinga blei i sommar delt, med dei som kjempar om opprykk i éi avdeling.
Os var fire poeng bak kamp om å vera med i denne, og er i staden no i ei kompakt haustavdeling for dei som kjempar om å unngå nedrykk.
Laga har tatt med seg poenga frå i vår til ei kompakt haustavdeling som speler dobbel serie.
Der ligg Os no på topp, to poeng framfor Sotra.
- Tabell og terminliste på fotball.no
