Nær utlikning mot Øygarden
Os forsvarte seg godt mot 2. divisjonslaget.
Før vinterferien blei ein planlagt treningskamp mellom Os og Øygarden utsett, tysdag kveld tok Os imot motstandaren frå PostNord-ligaen.
Øygarden landa på 7. plass i PostNord-ligaen avdeling 2 i fjor, og slo Os 2-6 i NM på seinsommaren.
Treningskampen i går gjekk over 2 x 35 minutt og var nær på å enda uavgjort.
Os - Øygarden 0-1 (0-1)
Os hamna under 0-1 på eit frispark kort tid før pause. Stillinga sto seg kampen ut.
– Steffen Kvamsdal breisida ballen rett utanfor i sluttminutta på ein stor sjanse av oss. I sjansar var det ganske likt i går, men eg skulle ønskt at vi varierte noko meir i presspelet vårt, og at vi var noko betre då vi hadde ballen, seier Os-trenar Endre Brenne.
Hovudfokus i kampen, og i førebuingane til kampen, var defensiv struktur.
– Der var vi solide. Vi låg tett og kompakt, med fine avstandar i laget. Eg skulle som sagt helst sett at vi varierte noko meir, men det er ei god kjensle, no når det nærmar seg sesongstart, å veta at du kan forsvara deg.
Os: Kasper Færøvik - Anders Havsgård, Torgeir Lunde, Petter Hilton - Thomas Spilde, Steffen Kvansdal, Kristian Halvorsen, Sverre Spangelo Haga - Sebastian Plätzer, Henrik Tysse Sperrevik og Roger Ekeland.
Innbytarar med speletid: Sander Dyngeland, Sander Kvittingen, Jonathan Mjånes Lund og Leif Simen Mjånes.
Bildeserie:
Øygarden stilte med tidlegare Os-spelar Knut Spangelo Haga, som kom innpå i 2. omgang og spelte mot veslebror Sverre Spangelo Haga på Os.
Os, som har hatt ei skadeprega oppkøyring, har fått Kristian Halvorsen og Thomas Spilde tilbake i spel.
– Marius Mikkelsen byrjar også å koma i form, og skal etter planen få seg nokre minutt i generalprøven på laurdag.
Laurdag (kl 17) speler Os heime mot Åsane 2 i det som blir siste treningskamp før NM-kvalik borte mot Sund laurdag 19. mars.
I tillegg har Henrik Tysse Sperrevik kome tilbake til Os etter to år i Sogndal og Lysekloster.
– Henrik har hatt ei fin utvikling sidan sist han spelte for oss, og vi er glade for å ha han tilbake! Han er målfarleg og har stor arbeidskapasitet, seier Brenne.
Os har følgjande resultat i treningskampane i vinter:
Os - Frøya 2-1
Os - Lysekloster 0-1
Varegg - Os 3-0
Os - Fana 3-6
Os - Bjarg 1-5
Os - Øygarden 0-1
