Masseslagsmål ved Bar2Be

Natt til laurdag kjørte politipatruljen heim eit par fulle menn som gjekk langs vegen, natt til søndag blei det litt meir å gjera på for politiet i Os.

Klokka 02.30 kom melding om ein svært full og vill mann på ein privatfest i Hegglandsdalen.

– Han var vaken og veldig aktiv, men veldig full, så han blei kjørt via legevakt til overnatting i arresten i Bergen, fortel politibetjent Rune Fimreite.

Vaktar i slåstkamp

Ein time seinare, etter stengetid på Bar2Be, braut det ut slåstkamp mellom folk som ville inn og nokre av vaktane.

– Det skal ha hagla med både slag og spark. 6-7 personar var involvert.

Vaktane var på staden då patruljen kom fram, men ikkje dei andre involverte.

– Men vi har namn på dei. Bar2Be vil melda episoden så saka blir følgt opp.

2 x mistanke om promille

Laurdag i 13-tida fekk politiet melding om mistanke om promillekjøring.

Men patruljen var opptatt og fekk ikkje sjekka ut to personar i ein Vectra på veg frå Lysefjorden over Langedalen på veg til Søfteland.

Søndag i 21-tida kom melding om eit anna tilfelle av mistanke om promillekjøring.

– Bilen blei stoppa og føraren viste seg å vera edru, seier Fimreite.

Full mann banka på døra

I 2-tida natt til søndag blei politiet kontakta etter at ein mann hadde banka på døra på Ravneberghaugen.

– Han var veldig full, men skulle visst berre på besøk i eit hus i nabolaget.

Politiet fekk tilsvarande melding frå same område tidlegare i veka.

– Men då var det ein som gjekk og kjente på dørhandtak om natta. Vi har ikkje mistanke om at desse to episodane heng saman.