Malte fotoboksen grøn
Automatisk trafikkontroll på Halhjemsvegen har vore innbringande, men dei siste timane har éin av dei vore ute av drift.
Ein av dei to ATK-boksane på Halhjemsvegen er utsett for hærverk.
– Det er uvisst kor tid det skjedde, men vi fekk inn melding på det i går, seier Christer Johannesen frå vegvesenet.
I dag var Johannesen på Lekven for å ordna boksen som kontrollerer trafikken retning nord mot Os.
– Store delar av fronten var spraya med grøn maling. Den dekka linsa, men var heldigvis lett å få av, seier han.
Eventuelle syndarar som blei knipsa frå i går til i dag slepp med andre ord truleg unna med skrekken.
– Første gong
Det var i november for to år sidan dei to fotoboksane på Halhjemsvegen blei sett i drift.
– Eg kjenner ikkje til at det har vore hærverk på ein av dei, dette er det vegvesenet som får melding om og som står for drift og vedlikehald av, seier trafikkordinator Inge Nordstrønen ved Bergen sentrum politistasjon.
Han reknar med at det er første gong at dei to boksane i Os er utsett for hærverk.
Færre syndarar
Då fotoboksane var ny-montert var fangsten høg, dei første fem dagane blei det synda for til saman 100.000 kroner berre i éin retning.
Det er fotoboksen som kontrollerer trafikken mot Halhjem (sør) som både er mest i drift og som tar flest syndarar.
Tal for 1. kvartal 2012 og 2013 viser ein liten nedgang i begge retningar.
1. kvartal 2012, retning nord:
14 syndarar, til saman 16.400 kroner i forelegg (672 driftstimar)
1. kvartal 2013, retning nord:
39 syndarar, til saman 36.000 kroner i forelegg (1.632 driftstimar)
1. kvartal 2012, retning sør:
433 syndarar, til saman 504.000 kroner i forelegg (2.240 driftstimar)
1. kvartal 2013, retning sør:
381 syndarar, til saman 478.000 kroner i forelegg (2.930 driftstimar)