Lysnar det for Ole Bulls villa?

Kjem det midlar til opprusting av Ole Bulls Villa på Lysøen i Statsbudsjettet for 2025? Måndag 7. oktober får vi svaret, når regjeringa legg fram sitt budsjettframlegg.

Det siste året har mange jobba intenst for å sikra rehabiliteringa av Ole Bulls Villa. Kommunen har m.a. hatt ein serie møte med kvar av partane i saka, og i juli hadde formannskapet ekstraordinært møte der ein oppsummerte saka.

I ettertid har eit viktig vedtakspunkt frå formannskapet funne si løysing gjennom at KODE og Fortidsminneforeingen avd. Hordaland har inngått ny langsiktig driftsavtale for Lysøen.

Dette har vore eit vilkår frå Kulturdepartementet for vidare statleg finansiering av rehabiliteringa av Ole Bulls Villa.

Vestland fylkeskommune og Bjørnafjorden kommune har også dialog om korleis vi saman med frivillige aktørar kan sikra skjøtsel og vedlikehald av gamletunet, sti-nettet og resten av uteområda på Lysøen.

Mange vil bidra, men vi er alle avhengig av at staten tek den største rekninga.

• Kulturdepartementet v/statsråd Abid Raja (V) løyvde 40 mill kr til rehabilitering av Ole Bulls Villa i 2021, men sjølve rehabiliteringa av villaen er ikkje starta opp.
• KODE har nytta ca 23 mill kr av løyvinga til registrering og konservering av inventar frå villaen, men vil ikkje gå vidare med rehabilitering av bygget før prosjektet er fullfinansiert.
• Siste estimat frå Kode er at dei treng ytterlegare 120 mill kr for å gjennomføra planlagd rehabilitering, og det er sendt fornya søknad om statlege midlar fordelt på åra 2025-27.

I formannskapsvedtaket av 11. juli legg Bjørnafjorden kommune til grunn at staten må ta ansvaret for å sikra det nasjonale kulturminnet etter Ole Bull, og ein peika på at det må løyvast midlar allereie i statsbudsjettet for 2025.

Om ikkje det skjer meiner eg vi står overfor ein kulturpolitisk skandale. Forfallet aukar diverre for kvart år huset står ubrukt, og det må handlast før det er for seint.

No har lokale partar v/Kode og Fortidsminneforeningen funne saman i ein ny langsiktig driftsavtale, og då vonar vi at regjeringa følgjer opp på måndag.

Då kan vi endeleg sjå at det lysnar for Ole Bulls Villa Lysøen.

Ordførar Terje Søviknes
Bjørnafjorden kommune