Lukasz og Frank overtar Ole B

Kokken Lukasz Brekke, som blant anna har vore på praksisplass på det som dei siste åra har vore rangert som verdas beste restaurant, Noma i Københamn, har fått visa kokekunstane sine på heimebane.

Les òg: Skummel sanseoppleving

Med "Det naturlige kjøkken", nordiske, kortreiste råvarer, fleire av dei henta i heimbygda og i nabokommunane, har Lukasz sidan starten i november 2012 fått boltra seg på Kafé Engeline sitt kjøkken på kveldstid.

Prosjektet blei ein suksess frå dag éin, med fullsett restaurant nærmast kvar fredag og laurdag fram til jul. Også etter nyttår har det vore høg aktivitet på det naturlege kjøkken. No er prøveperioden over og Lukasz skiftar lokale når han no flyttar til Lysefjorden.

– Eg var i dialog med Ole B-eigar Frode Søviknes parallelt med dialogen med Engeline før oppstart i haust. Etter nyttår tok vi opp igjen tråden og vi har no blitt einige om overtaking på gode vilkår, seier Lukasz.

Saman med hobbykokk, årets Salma-chef i 2012 Frank Vasby Bruarøy, overtar han driftsselskapet til Ole B-stuene 1. mars i år.

Bruarøy er ein av dei som har assistert kokken Brekke mest dei siste månadane.

– Ei god løysing for alle

Frode Søviknes eig både driftsselskapet Oleanna AS og lokalet og har sidan overtaking 1. juli 2010 investert mykje pengar på det som tidlegare heitte Kafé Ole B, ikkje minst i oppgradering av kjøkken, kjøl og frys.

Les òg: Ole B blei ny

– Eg har fleire verksemder og eigedomar og har den siste tida annonsert etter overtakarar på drifta av Ole B-stuene.

Dottera Renate, som styrte restauranten ei stund, har etter morspermisjon starta eiga verksemd, noko som var med på å få Søviknes til å søkja etter nye drivarar.

– At vi no får inn unge krefter med desse eigenskapene og interessene trur eg er det beste som kunne skjedd både for meg, kokkane og for Ole B sine mange gjestar.

– Eg veit dei vil halda på mykje av det Ole B har vore god på, samtidig som dei bringer dette nye og ekstremt smakfulle konseptet sitt inn i den etablerte restauranten.

– Og eg vil stå side om side med dei gjennom sesongen og hjelpa dei til å lykkast som nye restaurant-eigarar, seier Søviknes.

Tre dagar med ni rettar

Lukasz stadfestar at han vil halda på det Ole B har vore god på, kafeen på dagtid, den populære søndagsbuffeten og det folkelege samlingspunktet for både innbyggarane, hytteturistane, gjestar på Museet Lysøen og bergensarar som liker å ta turen til Os når dei har fri.

– Samtidig tar vi med oss "Det naturlige kjøkken", dei lokale råvarene og rettar i same kategori som vi har servert dei siste månadane. Desse vil vi by på frå torsdag til og med laurdag, i 3-, 6- og 9-rettars menyar, men også à la carte.

Søviknes fortel om eit viktig grep han gjorde då han overtok Ole B, å halda fram med å ta imot selskap, men ikkje å stenga dørene om det er blåtur eller 50-årsdag i restauranten.

– Folk skal alltid koma til Ole B og veta at dei kjem inn, at det er ope. Vi har mange selskap, både konfirmasjonar, bryllaup og firmafestar, men vi har alltid halde delar av huset ope for vilkårleg besøk.

– Kapasiteten er stor og restauranthuset har fin rominndeling. Sjølv om vi kjem til å ha bordbestilling torsdag til laurdag, blir det framleis ope for dei som kjem innom for å ta seg eit glas vin og treffa kjente, seier Lukasz Brekke.

Vil putta råvarer i akvarium

Hobbykokk og medinvestor Frank Bruarøy er ikkje berre glad i å laga sjømat, han liker også å fiska og dykka.

Og han ser føre seg at dei skal bygga ein tank, eller eit akvarium, å ha skjell, skaldyr og fisk i.

– Ferske råvarer er ikkje berre eit pluss på kjøkkenet, fram til vi tar dei opp av tanken kan krabbe og hummar også vera underhaldande å sjå på, ikkje minst for dei yngste, seier Salma-chefen.

Catering og samarbeid med andre

Om Brekke no flyttar kokekunstane sine til Lysefjorden på heiltid treng det ikkje bety at det berre er på Ole B du kan smaka mat frå "Det naturlige kjøkken".

– For det første er eg takksam for ei fantastisk tid på Engeline, og vil gjerne samarbeida med ei vidare i framtida, og for eksempel leiga meg ut som kokk til selskap i kafeen.

Søstrene på Engeline var ikkje tilgjengelege for kommentar om samarbeidet eller om dei vil driva vidare med kveldsopen restaurant.

– For det andre blir dette no ei fulltidssatsing og vi vil auka cateringverksemda Søviknes har hatt i Ole B-kjøkkenet.

Om du ikkje berre vil ha maten på døra, men heile kokken, kan det også lata seg gjera.

– Kokekurs er populært, men det går også an å invitera venepar heim og rett og slett berre få maten servert, rett for rett, frå kjøkken heime hos ein sjølv, med kokk i aksjon gjennom heile kvelden.

– Eit sentrum for båt- og hyttefolk

Søviknes fortel om mange hyggelege gjestar, også blant dei som om sommaren aukar folketalet i Lysefjorden.

– Ole B er godt kjent blant båtfolk og vi er velsigna med mange hyggelege hyttefolk i skjergarden i og rundt Os.

Dei nye drivarane er tipsa om den viktige målgruppa og kjem til å retta seg mot turistane med eigne tilbod.

– Når båt- og hyttesesongen er skikkeleg i sving så vil vi tilby delikatesser om bord i egen "sail away"-meny. Dei som berre vil ligga på fjorden og kosa seg, eller gjera strandhogg eller ta mat heim på eiga brygge, kan henta ferdige rettar hos oss, seier Lukasz Brekke, spent og entusiastisk to veker før overtaking.