Legg ned og seier nei

Tenesteutvalet i Os kommune går inn for å legga ned barnehagedelen av Halhjembarnetun. Samstundes seier dei nei til etablering av fleire nye barnehageplassar før barnehageåret 2012/13.

Allereie i 2009 nådde Os kommune staten sine krav om full barnehagedekning med god hjelp av private barnehageaktørar. Då staten la om finansieringa av dei private barnehagane i 2011 tilpassa dei ikkje-kommunale barnehagane seg den nye kvardagen, noko som førte til eit overforbruk på kommunalbudsjetta på heile 23,7 millioner kroner.

For 2012 viser utrekningar at barnehagane er underbudsjettert med 21 millionar kroner.

- Satsane for 2012 baserer seg på drifta i dei to kommunale barnehagane Lysekloster og Os i 2011. Som ei følgje av at Lysekloster dreiv med eit mindreforbruk i 2011, vil ikkje satsane for 2012 auka sjølv om eit administrasjonstillegg på 4 prosent skal leggast på bruttokostnadane, forklarte oppvekstsjef Ingvar Torsvik til tenesteutvalet.

Overkapasitet på 111 plassar

Tal frå kommunen viser at den totale barnehagekapasiteten i Os har ein overkapasitet på 111 plassar.

- Det er fleire barnehageaktørar som ønskjer å bidra til fleire barnehageplassar i Os. Det er konkrete planar for inneverande år både på Hjelle, Søre Neset, Skorvane og i Hjellemarka.

- Slik stoda er kan ikkje eg innstilla på at desse blir realisert i 2012, forklarte Torsvik.

Derimot vil han redusera den totale kapasiteten for å koma nærmare det reelle behovet og slik spara nokre kommunale kroner.

- Dei 12 plassane som blir borte når Askungen legg ned frå hausten blir ikkje erstatta.

- Frå same tidspunkt blir barnehagedrifta ved Halhjem barnetun lagt ned. Dei 16 borna som går her kan søka fritt på dei andre barnehagane i kommunen, men er garantert plass ved Os barnehage om dei ikkje får plass i den barnehagen dei ønskjer plass i, forsikra oppvekstsjefen.

Kontantstøtta gav debatt

Nedlegginga av barnehageplassar gav i tenesteutvalet ingen debatt. Politikarane har tatt inn over seg at noko må gjerast i forhold til den underfinansieringa som er på barnehageområdet. I samband med budsjetthandsaminga i desember blei det derfor vedtatt å innføra kommunal kontantstøtte til 2-åringane om dei ikkje går i barnehage.

- Eg er skuffa over saksframlegget ditt fordi eg opplever at du ikkje har svart på bestillinga om konsekvensane av å innføre kontantstøtta, sa Helge Olav Nygard (Krf) addressert til kommunalsjef Ingvar Torsvik.

- Kva er konsekvensane at vi tar ut 2-åringar frå barnehagane til fordel for kontantstøtte, vil dei berre bli erstatta av 0-åringar som ikkje har rett på barnehageplass, undra Nygard.

- Eg har brukt mykje tankekraft på om dette har nokon effekt i forhold til talet på ungar i barnehagane. Innføringa av kontantstøtta er i seg sjølv ei politisk motivert sak, for administrasjonen har det vore viktigt å få ned den bufferen vi har på barnehageområdet for å redusere kostnadane, svarte Torsvik, som ikkje ville vera einig i at han ikkje hadde svart på bestillinga frå politikarane.

- Men sakspapira gjev ikkje eit godt nok bilde av situasjonen, repliserte Nygard.

Ba om meir utgreiing

Arild Mads Nilsen (Ap) lurte på om det lét seg gjera å få ei oversikt/utgreiing på kor mange som kunne tenkja seg å bruka ordninga med kontantstøtte. Dette trudde Torsvik ville vera vanskeleg å gjennomføra.

- Ei slik undersøking vil ikkje vera bindande for dei som svarer og dermed er vi like langt, meinte Torsvik.

- Men ei slik undersøking vil i det minste gje oss ein indikasjon på kor attraktivt ordninga er, repliserte Nygard.

Enden på diskusjonen blei at politikarane ville ha saka betre utgreiia før kommunestyremøtet 27. mars. Då særleg at dei økonomiske konsekvensane av kontantstøtta blir betre belyst. Nedlegging av barnehagen ved Halhjem barnetun og stopp på nyetableringar fekk einstemmig tilslutning.