Lang, lang lenke
Opptur Motbakkeklubb valte den verste dagen å ta 150 meter med lyslenker opp til toppen av Borgafjellet.
Bildeserie:
Først blei linene til Os Kulturutvikling tatt ned, så fekk dei løyve til å få dei opp igjen. I mellomtida har dei tre lyslenkene, kvar på 50 meter, vore downtown Os for reparasjon.
– Alle viser velvilje, fortalte Georg Jørgensen i førre veke om støtta Os Kulturutvikling har fått for å få lysa opp igjen.
I regn og storm tysdag kveld stilte den aktive og veksande Opptur Motbakkeklubb opp for å ta lenke til fjells.
Frå magisk til tragisk
– Vi var på Linken i går, fleire av oss med ein del kilo i ryggsekken for å gjera turen tyngre. Detteblir peanuts, sa Klas Færøvik før avmarsj frå Hjelle i 17-tida i ettermiddag.
– Litt forskjell er det likevel, vêret var magisk i går.
I ettermiddag har det heller vore tragisk, med liten storm og stor nedbørsmengde.
Likevel var responsen god då Klas inviterte lagkamerater, og -venninner, med på tur.
– Hjelper gjerne fleire gongar
– Tidspunkt for avmarsj blei ikkje bestemt før i formiddag, men då eg spurde via facebooksida vår om nokon ville vera med så var det jo ein god gjeng som på strak arm var klar for å hjelpa til!
– Turen gjekk fort og greit, sjølv om lenkene tok så mykje plass i sekken at nokre av oss måtte lenka oss saman ved å dela same lenke i kvar sin sekk.
Å lenka saman idrett og kultur har han også sansen for.
– Lysa på Borgafjellet er det mange som er glade i, her gjer Os Kulturutvikling ein kjempejobb.
– Vi hjelper gjerne til fleire gongar, anten det skal skiftast lyspærer eller lenkene skal berast ned igjen etter jul, seier Færøvik.
Målet er å tenna lysa i helga som kjem, innan 3. søndag i advent. Lysa skal ned igjen 9. januar.