Lager Sverre-tur til Inzell

Bildeserie:

Full skjerm

1 av 2

I 2016 lagde Midtsiden, i samarbeid med Os Reisebyrå, tur med buss og hotell til verdscupen i Stavanger. Rundt 50 osingar fekk med seg stemninga i Sørmarka Arena, halvparten av dei reiste samla.

No har Os Travel tatt initiativ til ein tur til Inzell i februar, for å heia Sverre Lunde Pedersen, Håvard Holmefjord Lorentzen, Sindre Henriksen og resten av skøytelandslaget til VM-gull.

– Dei hadde ein knallsesong i fjor, og Sverre ser ut til å vera i endå betre form i år. VM enkeltdistansar går på den raske isen i Inzell, og eg trur det vil vera ei stor oppleving å få med seg meisterskapen og stemninga i den idylliske, tyske landsbyen, seier Hans Parnefält frå Os Travel.

• Sjå òg: Tilbakeblikk og kalender for neste Sverre-sesong

Tre dagar i Salzburg og Inzell

Turen går frå onsdag til laurdag første veka i februar. Det betyr at du får med deg Sverre Lunde Pedersen sin 5000 meter og lagtempo, mens du kan sjå 1500-meteren søndag heime i sofakroken.

– Eg har fått ein god pris, for 8000 kroner får du fly, tre netter på hotell, inngang på Max Aicher Arena og buss frå hotellet til arenaen begge dagane.

Overnatting er ein time i buss frå Inzell, i Salzburg i Austerrike, Mozart sin fødeby, med 150.000 innbyggarar og eit rikt kulturliv.

– Vi håper vi får målt responsen rimeleg raskt, i tilfelle kapasiteten må utvidast. Folk betalar berre depositum i starten, resten av rekninga kjem seinare.

Tore Kleppe leiar an - som førstemann til mølla

Os Travel har i første omgang sikra seg 20 billettar. Forutan reiseleiar Hans og minst éin frå Midtsiden-redaksjonen, har Tore Kleppe vore rask med å sikra seg billett.

Ein av Noregs hyggelegaste handverkarar, og ein stor supporter av ulike idrettar i Os, har aldri sett Sverre live før.

– Når vi har ein utøvar i verdstoppen, i ein vinteridrett, så må vi slå til! Det kan gå fleire tiår til neste gong! Planen var å vera med til Stavanger i 2016, men då skulle vi noko anna. Å reisa til Austerrike og Tyskland blir sikkert minst like kjekt, trur Tore.

For å løfta opplevinga for heile resiefølgjet er Kleppe med til sponsa pris.

– No skal det handlast inn supporterutstyr, sauebjeller og andre ting som kan hjelpa dei norske skøyteløparane til gull!

Midtsiden har også vore i kontakt med den ruvande supporteren Brynjar Øvstedal, som førebels ikkje ligg an til å reisa. Ei eventuell overlevering av luren til Jimmy, til mr Kleppe, vil bli nøye dokumentert.

Informasjon om turen:
• Onsdag 6/2-2019 kl 10.10: Avreise frå Flesland, direktefly til Salzburg
• Tre netter på Star Inn Hotel Salzburg Zentrum (3 stjerne) i gamlebyen
• Inngang og sitjeplass Max Aicher Arena Inzell torsdag og fredag
• Buss til og frå flyplass og til og frå Inzell
• Heimreise laurdag 09.55, ankomst Bergen 12.15
For detaljar, sjå ostravel.no