– Kva? Ei ny bok om meg?

På seinsommaren i fjor kom Sølvi Bugge med bok om Hamnesjefen. Legesekretær Bugge debuterte som forfattar med boka om Café Intim, kafeen mora dreiv ved Oselvo.

No er ho klar med ei ny bok om livet langs elva - fuglelivet også denne gong.

– Denne handlar ikkje berre om Hamnesjefen, men om resten av fuglelivet i Oselvo, om og korleis vi skal forholda oss til fuglane, seier forfattar Sølvi Bugge.

Det var då Hamnesjefen byrja å bruka meir tid ute i hamna enn i elva at Sølvi, som har kontor i Landboden, la betre merke til dei andre artane, til hegren, måsane, endene og skarven.

Tittelen på boka er Vi er flere enn Havnesjefen i Oselvo.

– Men knoppsvanene våre er med i denne boka òg.

Interessant tema - viktig bodskap

Bugge har fleire medhjelparar til boka, som kom frå trykkeriet før helga.

Kunstnar Bjørn Meidel Hansen frå Os har illustrert fuglelivet, tidlegare BT-journalist Inge Sellevåg har skrive faktatekstar.

Ei av kjeldene hans er seksjonssjef i miljøvernavdelinga hos Fylkesmannen i Hordaland, Stein Byrkjeland.

Byrkjeland har drive med forvaltning av vilt og naturreservat i mange år, og seier det er ei interessant auke av knoppsvaner i Hordaland.

– Menga sangsvaner som overvintrar har tatt seg kraftig opp, men også dei fastbuande knoppsvanene har det dei siste 10-13 åra blitt fleire av. Og knoppsvanene klarer seg betre om vinteren, spesielt no når det har vore så kalde vintrar så har sangsvanene hatt vanskar med å finna nok mat.

Knoppsvanene, som Hamnesjefen og resten av familien i Oselvo tilhøyrer, er Danmark sin nasjonalfugl og har truleg spreidd seg frå Rogaland og oppover langs vestlandskysten.

– At knoppsvanene buset seg i eit sentrum, i ei trafikkert elv ved ei trafikkert hamn, er eit nytt fenomen hos oss.

– Det er viktig å hugsa på at det er vi menneske som må tilpassa oss dette, ikkje fuglane. Det ligg i knoppsvanene sin natur å beskytta ungane, vi må berre halda avstand og vera varsame.

– Vi har ikkje lov til å plaga svanene - og det er heller ingen god grunn til å gjera det.

Folkeleg interesse

Sølvi ser for seg korleis fuglane har det, og har lett for å tileigna fuglane menneskelege eigenskapar, kjensler og tankar.

– Det kalde vitskapsmiljøet bruker eit framandord på dette, anthropomorfisme, som eit skjellsord, seier Inge Sellevåg.

– Men eg synest Sølvi legg fram historiane sine på ein fin måte. Du blir ikkje løfta til sinns av å lesa ei bok om ornitologi, ei fagbok om fuglar, men fuglar rører ved det inste i oss og mange har ei folkeleg interesse for fuglar, sånn som Sølvi har.

Sellevåg jobba som journalist i Bergens Tidende i 42 år, dei siste 10 åra innan populærvitskap.

– Sjå til Os!

Også Sellevåg synest det er spennande og spesielt med knoppsvaneparet som hekkar i Oselvo, så nær sentrum og bustadar, år etter år.

– Sjå til Os! seier eg, og håper kommunen kan halda fram med å vera eit forbilde innan det å ta vare på eit rikt fugleliv.

Bugge er også nøgd med at brannvesenet og andre følgjer med og hjelper til om det er noko, som då Hamnesjefen og ungane i fjor var blyforgifta.

Brannvesenet hjelpte til, både med å ta ein fiskekrok ut av eit nebb, med å prøva å fanga svana og ved å kutta laus ei svane som sette seg fast i noko tau.

Og kommunen tok veterinærutgiftene då det var blyforgifting i elva, ei giftkjelde ein Midtsiden-lesar til slutt fann.

– No jobbar eg med å få opp eit skilt som fortel om fuglane, og litt om korleis vi skal oppføra oss når Hamnesjefen er i nærleiken, seier Sølvi Bugge, som blir å treffa med boka si under marknadsdagane på Os til helga.

Sølvi signerer bøker på Osøyro Libris torsdag og på Kafé Engeline laurdag.