Kripos bistår i valdtektssaka
Politiet i Os er framleis interesserte i tips etter overfallsvaldtekta i Øyane. No får dei hjelp av Kripos i etterforskinga.
I førre veke gjekk politiet ut og fortalte om ei overfallsvaldtekt på Brimsholmen tysdag 16. februar.
Politiet ba alle som var på Brimsholmen og naboøya Lepsøy den aktuelle ettermiddagen melda seg for politiet.
– Vi har fått inn nokre tips, men ønskjer framleis fleire, seier politioverbetjent Audun Hadler-Olsen.
Kripos er kopla inn
Os lensmannskontor bruker store ressursar på etterforskinga, og i går blei også Kripos kopla inn i saka.
– Vi får teknisk og taktisk bistand, fortel Hadler-Olsen.
Politiet har vore knappe med informasjon i pressen i saka, og går framleis ikkje ut med verken skildring av gjerningspersonen, alder på kvinna, staden ho har blitt valdteken på eller andre opplysingar.