Korona-tilrådingane utvida med ei veke

Bjørnafjorden kommune forlengjer tilrådingane i samband med smittesituasjonen i Bergen.

Dette opplyser Bjørnafjorden kommune på nettsidene sine.

Assisterande kommuneoverlege Jonas Nordvik Dale seier det er positivt at Bergen no ser ut til å ha kontroll på utbrota. Men med karantenetid på 10 dagar vil det framleis vere mogleg med nye smittetilfelle.

– Vi ønskjer difor å vera forsiktige med å opna opp for raskt. Dette er også i tråd med korleis dei andre nabokommunane til Bergen tenkjer.

• Les òg: Unngå unødige reiser til Bergen

– Vi oppmodar alle innbyggarar som jobbar i Bergen om å bruke heimekontor så langt det er mogleg, og vi oppmodar til å unngå unødvendige reiser inn til Bergen og unngå plassar der mange folk er samla.

– Dersom du likevel må til Bergen med kollektivtransport, tilrår vi bruk av munnbind dersom det ikkje er mogleg å halde ein meters avstand.
Bjørnafjorden kommune følgjer dei nasjonale reglane for arrangement og private tilstellingar.

– Alle kommunalt tilsette i Bjørnafjorden kommune som bur i Bergen, skal så langt det er praktisk mogleg ha heimekontor. Er du i tvil, avtal med næraste overordna.

– For alle andre kommunalt tilsette i Bjørnafjorden kommune, gjeld dagens praksis med oppmøte på arbeidsstad som hovudregel.

Tilrådingane frå kriseleiinga i Bjørnafjorden kommune gjeld no altså til og med tysdag 29. september.

Datoane* for dei smitta i Bjørnafjorden til no:

* dato for offentleggjering via kommunen. Vedkomande kan ha fått konstatert smitte dagen før.

14 smitta i vår:
11. mars: Mann i 50-åra, smitta etter utanlandsreise.
14. mars: Mann i 50-åra og mann i 30-åra, ein av dei etter utanlandsreise.
20. mars: Kvinne i 20-åra, den første smitta på Fusa-sida av kommunen.
21. mars: Mann og kvinne i 40-åra.
23. mars: Fire nye smittetilfelle. Alle er i nær relasjon til ein annan smitta. Kjønn og alder er ikkje opplyst om.
4. april: Kvinne i 30-åra. Første konstaterte smitta på 12 dagar.
7. og 8. april: Smittetilfelle nummer 13 og 14, ein mann i 20-åra og ei ti år gamal jente.
14. april: Ektepar i 70-åra.

Til no 13 smitta i haust:
10. august: To i 20-åra etter utanlandstur.
(14. august: Soldat smitta i Ulven leir)
17. august: Mann i 20-åra smitta etter lengre opphald i utlandet.
21. august: Kvinne i 20-åra smitta innanlands, men i ein annan kommune.
26. august: Kvinne i 20-åra. Ho har vore i nærkontakt med kvinna som blei konstatert smitta 21. august, og er med andre ord den første i haust som er smitta internt i Bjørnafjorden kommune.
5. september: Ein mann i 20-åra i Bjørnafjorden kommune har testa positivt for covid-19. Smittevegen er kjent.
7. september: Mann i 30-åra.
11. september: 12 år gamal elev ved Os barneskule er smitta etter kontakt med ein smitta frå ein annan kommune.
13. september: Kvinne i 20-åra, smitta av nærkontakt frå ein annan kommune.
14. september: Kvinne i 20-åra, smitta av nærkontakt frå ein annan kommune.
16. september: To kvinner i 20-åra, smitta i Bergen.
17. september: Mann i 20-åra, smitta i Bergen, same stad som tre andre i 20-åra, meldt 13. og 16. september.