Korona har kosta Inka dyrt. Utan Dale hadde det blitt dyrare

Inka AS har fått merka koronapandemien på ulike måtar.

Fiskeforedlingsselskapet har rundt 100 tilsette, fleire av dei er frå utlandet, og firmaet sette 8. september den nye fabrikken i drift.

– Dei to nye produksjonslinjene skal optimaliserast, og her ligg vi bak skjema. Målet var full drift frå starten på november. No ligg vi på 60-70 prosent, og er nok ikkje i full drift før i februar, seier innehavar Karsten «Kakki» Austevoll.

Ekspertrise frå den utanlandske leverandøren har reist til og frå i den grad det har lete seg gjera. Nokre av våre tilsette har òg hatt behov for å reisa inn og ut av landet.

– Her har assisterande kommuneoverlege Jonas Nordvik Dale vore heile fantastisk! For det første har han alltid svart telefonen, tidleg og seint, for det andre har han alltid lytta og gitt gode råd.

– Det har vore ein tryggleik. For oss, og sikkert for andre i det lokale næringslivet, har han ein livsviktig funksjon. Sånn som han skulle alle ha vore, meiner Kakki.

Glad for velvilje og takksam for ros

Dale verkar overraska og glad når han får høyra kommentarane frå Inka-eigaren.

– Dette var jo hyggeleg å høyra!

– Eg trur og at vi som er tilsette i Bjørnafjorden kommune er heldige. Eg høyrer om andre kommuneoverlegar eller smittevernlegar som nærmast blir truga når dei er i dialog med næringslivet, men sjølv opplever eg berre at bedriftsleiarane er opptatte av å gjera sitt beste når det kjem til smittevern.

– Det er nesten sånn at eg må minna dei på at dei skal tena pengar oppi alt dette, fortel Jonas og ler.

Han har inntrykk av at næringslivet i kommunen er veldig fokusert på både å ta vare på sine tilsette, å halda smitten ute og å hjelpa til med smittesporing, når det har vore behov for det.

– Saman har vi funne mange gode løysingar, blant anna med testing og bustad for tilreisande arbeidarar.

Bruker 300 munnbind - om dagen

Kakki, som før helga blei nominert til «Årets navn» i sjømatnæringa, er glad for at Inka berre har hatt eitt smittetilfelle blant tilsette.

– Vi iverksette stopp i tre skift. Det er 3 x 40 personar. Alle testa negativt.

– Heldigvis viste det seg at vedkomande ikkje hadde vore på jobb dei tre siste dagane før smitte blei påvist, og hadde få nærkontaktar.

Trass god hjelp og støtte har det kosta å driva i 2020. Med mange tilsette blir det blant anna høgt forbruk på varer du ikkje får dekka, som 300 munnbind for dagen og store mengder handsprit.

– Vi har ikkje rekna på det enno, men koronapandemien har nok kosta oss rundt ein million kroner i år, seier Austevoll.