Kasta gjengangar i kasjotten
Politiet har i helga tatt hand om ein som truga ein medhjelpar i tingretten og ein som blei tatt for ein serie hendingar, med kniv og narkotika i lommene.
Fredag og laurdag formiddag fekk politiet melding om blant anna steinkasting og utforkjøring.
Les òg: – Oi sann!
Laurdag ettermiddag og kveld fekk dei fleire møte med mannen som natt til laurdag kasta stein og laurdag formiddag blei fjerna frå eit bufellesskap der han lagde bråk.
– Mannen hadde kniv på seg. I tillegg fann vi noko vi trur er narkotika, seier politioverbetjent Terje Sperrevik.
I 21-tida laurdag kveld blei mannen, som er rundt 40 år gamal, sett i fengsleg forvaring.
Trailer tok spegl
Måndag morgon i 7.15-tida fekk politiet melding om trafikkuhell på Halhjemsvegen.
– Ein blå trailer hadde kome delvis over i motsett kjørefelt og knust speglet på ein bubil.
– Trailersjåføren stoppa ikkje og forholdet er meldt.
Truga tingretten-medhjelpar
Laurdag i 19-tida fekk politiet melding om trugslar.
Ein rusa og fortvila mann hadde truga ein medhjelpar i tingretten. Han blei tatt hand om, sett i arresten og dimittert etter avhøyr søndag.
Sint fotgjengar og fulle venninner
Natt til søndag fekk politiet melding om ein mann som gjekk i vegen ved Halhjem Kafé og slo etter forbipasserande bilar.
Då patruljen kom fram var vedkomande vekke.
På natta kom det også melding frå Os Taxi, som hadde to venninner i bilen som skulle heim til ho eine. Problemet var at vertinna ikkje hugsa adressa si.
– Det løyste seg ved at dei blei kjørt heim til ho andre.
Med to ulike, utgåtte prøveskilt
I løpet av natt til søndag blei det stoppa ein bil på Søfteland som ikkje hadde alt på stell.
Bilen hadde prøveskilt framme og bak, to ulike prøveskilt, og begge var gått ut på dato.
Framleis høg fart i Dalen
Den siste tida er det tatt beslag i heile 9 førarkort på Hatvikvegen og Hegglandsdalsvegen.
Det hindra ikkje fleire bilistar frå å kjøra for fort natt til søndag.
– Vi hadde promillekontroll på natta. Ingen blei tatt med promille, men fleire fekk muntleg pålegg om å redusera farten.
– Vi hadde ikkje målingar på dei, men det er litt skuffande at fleire held fram med å kjøra for fort på desse vegane. Men vi kjem til å halda fram med fokus på trafikktryggleiken i Os, spesielt i Hegglandsdalen og på Hatvik, åtvarar Sperrevik.