Kan Siri slå Eirik?

Osingen Eirik Søfteland er storfavoritt før fredagens finale i Idol, oddsen er nede i 1,25 på Eirik mot 3,5 på finalemotstandar Siri Vølstad Jensen.

Les òg: Kongeoppdrag på KingCalling

Heimepublikummet støttar opp og laurdag blei alle dei nærmare 500 gratisbillettane til finalefesten i Oseana røska vekk på 11 minutt.

Kva med Siri?

Men korleis er stemninga i heimbygda til Siri, i tettstaden Ålgård i Gjesdal kommune, rett sør for Sandnes og Stavanger?

– Då Kjartan Salvesen vann Idol i 2004 så kokte det i heile Stavanger. Han vann nok mykje på at han var ein så utprega Viking-supportar, og vi er nok ikkje i nærleiken av den Idol-stemninga i sjølve Stavanger som den gong, seier journalist Egil Ø. Nærland i Stavanger Aftenblad.

– Men vi ser at det er voldsom respons på heimesidene våre og på facebook-sida vår når vi publiserer saker om Siri, og i heimkommunen herjar Idol-feberen for fullt.

Gjesdal kommune har rundt 11.000 innbyggarar.

– I tillegg er Siri elev ved Vågen vgs, ein skule som er god på dette med dans, drama og musikk, og som har rundt 1000 elevar. Eg vil tru at mange av desse støttar Siri, så det blir ein spennande finale.

Lager vake i Kongeparken

Eirik har aldri vore blant dei med færrast stemmer, men Siri har berre stått i fare for å ryka ut éin gong, då Astrid Sugaren rauk ut.

Då det var countrykveld i Idol, favorittsjangeren til Siri, var det vake i westernbyen i fornøyelsesparken Kongeparken i Ålgård. Ålgård er den største tettstaden i Gjesdal kommune.

– No på fredag er det vake i Kongeparken igjen. Denne gongen opnar dei amfiet, ein sal som har plass til 1000 tilhengarar, seier Nærland

– Takksam for støtta

Siri fortel at ho er overraska og glad for at ho har kome så langt i Idol.

– Eg er veldig takksam for den støtta heimbygda har vist og det var veldig kjekt å sjå kor mange som hadde samla seg i westernbyen sist. No er eg spent på kor mange som kjem komande fredag.

Ho synest Eirik er både flittig og flink.

– Han er ein knakandes kjekk fyr som jobbar veldig hardt. Eg er veldig glad for at eg får stå på scenen med han i finalen, seier Siri til Midtsiden.

Sånn blir finalen (som startar kl 20.00) - der Siri syng som nummer 1, Eirik som nummer 2.

Siri Vølstad Jensen syng:
"Gode girls gone bad" (sjølvvalt, The JaneDear Girls)
"Some nights" (Fun)
"What it feels like" (finalelåta, blir gjeve ut finalekvelden)

Eirik Søfteland syng:
"Gonna go my way" (sjølvvalt og eigenkomponert)
"Bad" (Michael Jackson), valt av dommerne
"What it feels like" (finalelåta, blir gjeve ut finalekvelden)