Kan legevakt og brannvesenet stå fast i ferjekø?

Bildeserie:

Full skjerm

1 av 1

Måndag 2. mai blir eit av kjørefelta på E39 stengt mellom Moberg og Svegatjørn.

Les òg: 1500 ekstra bilar gjennom sentrum

Vegen blir stengt i retning nord, i fire månadar, i den mest travle tida for det største ferjesambandet til og frå Os; Halhjem-Sandvikvåg.

Snittet bilar frå Sandvikvåg til Halhjem aukar frå 1000 til 1600 bilar per dag frå vintermånadane til sommarmånadane. Denne sommaren skal denne ferjetrafikken nedom Os sentrum på veg mot Bergen.

I Os sentrum kjem ferjetrafikken til å koma samtidig med trafikken frå Hatvik minst fem gongar om dagen (sjå skjema/bilde over).

Kva om brannvesenet får utrykking til Hatvik, Varåsen, Søfteland eller andre område nord for sentrum i denne tida?

Fleire har reagert og kommentert førre sak vi skreiv, med praktisk informasjon om stenginga. Kvifor stenger dei ikkje den andre retninga? Kvifor ikkje gjera som på E16 mellom Voss og Bergen, der dei har lysregulert trafikk begge vegar i eitt felt?

Vi har ikkje vore i yttarlegare dialog med vegvesenet i påsken, men kva tenkjer brannsjefen i Os om situasjonen?

– Vi har ikkje blitt spurd

Leiar for beredskap i Os, brannsjef Stein Gjøsund, seier på vegne av Os legevakt og Os brann- og redningsteneste, at dei ikkje har blitt spurd i saka.

– Om vi hadde blitt spurd så ville eg anbefalt å stenga motsett retning, seier Stein Gjøsund.

– Slik det blir no så må både brannvesenet og legevakten, om vi skal nordover, køyra i kø med resten av ferjetrafikken gjennom Os sentrum. Vegen frå Moberg til sentrum, og vidare, er lite eigna til å tråkla seg gjennom i tilfelle kø.

Enklare for ambulansen?

Os-ambulansen, som har base i motsett ende av den stengte vegen, blir ikkje råka på same måte slik planane er no.

– Om det hadde vore motsett veg som blei stengt ville det likevel vore mindre samtidig trafikk og kanskje også enklare for ambulansen å koma seg frå Kolskogen rundt Ulven og Skeie, om dei skal sørover, enn det blir for oss gjennom sentrum.

– Dette har vi verken drøfta eller sett nærmare på. Det einaste vi veit om saka er det vi har lest i avisene, seier Gjøsund, som ikkje legg skjul på at han hadde ønskt seg betre dialog med vegvesenet i samband med saker som dette.

– Er det mogleg at trafikken sør kan stengast ved utrykking, at de likevel får lov å køyra nordover frå Moberg til Svegatjørn?

– Det veit eg heller ikkje.

Vil uansett klara kravet

Trass synspunkt om val av retning kjem Gjøsund ikkje til å gjera nokre aktive grep i saka.

– Vi har vurdert korleis trafikkbildet vil bli og kva utrykkingstid vi vil få. Vi vil klara kravet, som er 20 minutt frå melding til ankomst.

– I fleire situasjonar kan både minutt og sekund vera avgjerande, og vi ønskjer alltid å vera så raskt på staden som mogleg. Men så lenge vi klarer kravet har eg dessverre ikkje grunnlag for å klaga.

Les òg: 35 minutt frå Moberg til Søfteland?

Midtsiden samleside: Brann og redning

Midtsiden samleside: E39 Svegatjørn-Rådal