Innsamling med amerikansk vri

Jenter frå det nystarta Os Turn Cheerleading hadde sitt første stunt torsdag då dei hadde bilvask ved Plantasjen.

Les òg: – Kult på cheerleader camp

– Det er veldig amerikansk, akkurat som cheerleading, seier leiar av cheerleadarane Mia Elnes.

Skal jobba for pengane

Med god dirigering frå Mia vaska jentene frå dei to eldste gruppene bilar med stor iver.

– Eg vil at dei skal jobba for pengane, ikkje berre gå og be mor eller far.

– Å vaska bilar for å samla inn pengar er heilt normalt i USA og der kan ein fort få inn over 7000 dollar.

Cheerleadarane samlar inn penger til utstyr, men innsamlinga er også ein god måte for jentene å bli betre kjend og å gjera fleire kjend med cheerleadingtilbodet i Os.

Annleis men gøy

Anna Parnefält er med i varsitygruppa, som er dei frå 15 år og opp.

– Å organisera bilvask er veldig annleis, men veldig gøy!

– Vi er eigentlig 50 jenter totalt, men på grunn av ferie så er ikkje alle med i dag, fortel Anna.

Cheerleadingtreninga startar denne veka, og det er framleis ledige plassar på gruppa.

– Alle er blitt sammensveisa og vi har det veldig kjekt i lag, seier Anna

Sjølv om dei ferske cheerleadarane allereie har lært mykje på kort tid, så kjem dei ikkje til å konkurrera det første året.

– Men vi kjem til å bli med på kampane til Os Wolverines og kanskje på enkelte fotball- og handballkampar, om det er plass til oss.

Har mykje i ermet

Då Mia kom opp med ideen om bilvask var det fleire av jentene som blei sjenerte.

– Då fortalde eg dei at det finnest ikkje sjenerte cheerleadarar, og etter det var dei med, seier den overbevisande coachen Mia.

– Vi har ingen forventingar om å samla inn mykje penger i dag, det viktigaste er for jentene å knytta endå tettare band.

Og ifølge Mia er ikkje bilvask det einaste stuntet ho har tatt med seg frå USA til Os.

– Eg har mykje i ermet så det er berre å følga med, seier Mia med eit lurt smil.