I år blir det dragebåtfestival igjen
– Håper å skapa folkefest!
På 1990-talet samla dragebåtfestivalen 25.000 feststemte i Bergen.
I 2015 og 2016 samla teknisk arrangør Rune Nilsen og Solsiden-drivar Tore André Sagstad mange gode lag til marsj og kapp-padling i Os hamn.
Solsiden er historie, men Rune Nilsen held det flytande.
No har Nilsen fått Catten Nightclub med på å arrangera dragebåtfestival i Os igjen.
– Det er i forsøk på å skapa ein ekstra livleg laurdag i Os, seier Catten-eigar Bjarte Andersen.
Datoen er laurdag 8. juni. I dag opna det for påmelding.
– Vi håper å få til ein liknande start som sist, seier Andersen sin medhjelpar, Jostein Eck.
Det betyr oppstilling og avmarsj frå fotballbanen på taket på Giskavollen Parkering, parade gjennom Osøyro og base for padling i hopen ved Oselvarnaustet.
På kvelden blir det fest og levande musikk i Vognhallen før festen spreier seg på utestadane i sentrum.
Om bord i ein dragebåt er det ti padlarar pluss éin som trommer takta.
Ofte høyrer det med entusiastiske kollegaer på bryggekanten. Alle i båten, og på land, med kostyme på. Helst.
– Vi håper firma, åleine eller saman med andre firma, og private venegjengar, samlar seg om dette som fin lagbygging og sommarfest før ferien, seier Bjarte og Jostein.
I sakene under ser du bildeseriar og videoar frå 2015 og 2016.
