Hugs å sjekka røykvarslaren!

Røykvarslardagen 1. desember er ei viktig påminning om å ta brannsikkerheita på alvor. Spesielt når vi no går inn i ein tid på året der det tradisjonelt brenn meir enn elles.

I samband med dette blir det gjennomført ein kampanje frå brannvesenet i Bjørnafjorden fredag 29. november. I tillegg til stand på kjøpesentera Amfi Os, og Fjorden senter i Eikelandsosen, vil det bli gjennomført en bustadkontroll i om lag 100 utvalde bustader.

– Her i vårt nedslagsområde rykka brannvesenet ut til 12 bustadbrannar i fjor, og 11 hittil i år, seier Leier Brannforebyggende avdeling, Arne Rødberg.

Open eld

61 prosent av brann i bustad skjer i einebustad, medan nær halvparten av brannårsakene var brann på komfyr.

Det er verd å merke seg at der liv går tapt i brann, skjer dette oftast i samband med røyking og open eld.

Røykvarslardagen er ein landsomfattande kampanje som går fast av stabelen 1. desember kvart år.

Det er Brannvernforeningen, DSB og Gjensidige forsikring som står bak kampanjen sentralt. Lokalt er det brannvesenet og DLE (Det lokale El-tilsyn) som bidrar til å setje fokus på den viktige bodskapen.

Høyrast i alle rom

– Om røykvarslarane fungerer slik dei skal, så må dei høyrast tydeleg på opphaldsrom og soverom, òg når døra mellom romma er lukka.

– Alle må ha minst éin røykvarslar i kvar etasje. Dei fleste har fleire varslarar, og då tilrår vi at dei er seriekopla slik at om éin piper, så piper alle. I tillegg til 1. desember, bør du teste røykvarslarane dine jamleg, samt etter at du har vore borte i ei veke eller meir, seier Arne Rødberg.

Ta ansvar for dei nærmaste

Brannstatistikken viser at det er nokre risikoutsette grupper som er meir utsette og sårbare om ein brann inntreff. Det er blant anna eldre og personar med nedsett funksjonsevne.

– Mange av desse vil ha vanskeleg for å sjekke røykvarslaren(e) sjølve, og vi oppfordrar difor alle som har moglegheit til å hjelpe dei ein kjenner som kan tenkjast å slite med dette, seiar Arne Rødberg.

På www.roykvarslerdagen.no finn du nyttig informasjon om tiltak som betrar brannsikkerheita i heimen.

Røykvarslarar og brannsikkerheit

• Har du nok røykvarslarar? Ein undersøking frå Ipsos viser at 5 prosent av befolkninga ikkje har, eller er usikre på om dei har, røykvarslar. Det svarar til opptil 200 000 personar.
• Kvifor røykvarslar? Røykvarslaren er heimen sin viktigaste livreddar, og ein enkel måte å auke brannsikkerheita på.
• Krav til røykvarslar: Alle bustader skal ha røykvarslarar eller brannalarmanlegg, og du må ha minst éin varslar i kvar etasje. Alarmen må kunne høyrast tydeleg i opphaldsrom og soverom, òg når dørene mellom romma er lukka.
• Plassering av røykvarslar: På høgaste punkt i taket, og minst ein halvmeter ut frå veggen.
• Levetid og godkjenning: Røykvarslarar bør bytas ut etter 8-10 år. Sjekk produksjonsdatoen på baksida. Forhandlarar er ansvarlege for at røykvarslarane som seljast er produsert i samsvar med regelverket. Sjekk at varslaren er CE-merka.
• Bruk seriekopling: Seriekopla røykvarslarar sikrar at alle varslar samstundes i heile bustaden.
• Røykvarslarar er EE-avfall: Gamle og brukte røykvarslarar skal ikkje kastast i søpla, men kan leverast gratis til forhandlarar og til din lokale gjenvinningsstasjon.