Horneland besøker Sleivkast i morgon. Har du spørsmål?

I skrivande stund held Eirik Horneland på å førebu spelarane sine på heimekamp mot Molde med avspark 19.15.

I morgon etter første trening tar han turen til Kuventræ for å stilla i video- og podkast-serien Sleivkast.

– Vi tar gjerne imot spørsmål frå sjåarane, seier Sleivkast sin fotballekspert Lars Bakkerud.

Har du spørsmål Lars og Davy bør stilla Horneland? Send til tips@midtsiden.no innan klokka 12 måndag.

Men det er, som du sikkert ser for deg, ikkje sånn av verken Bakkerud eller programleiar Davy Wathne sjølv er tom for tema dei vil ta opp med regionens største fotballprofil.

– Eg er ein gamaldags journalist, altså ein journalist som framleis er nysgjerrig, ikkje ein som trur eg veit alt sjølv, seier Davy.

Han hadde 22 år i BT og 25 år i TV 2, og meiner det er mykje dagens sportsjournalistar ikkje fangar opp.

– Horneland har fått til noko i Brann. Korleis? Kva er forskjellen på å trena Haugesund og på å trena Brann - og kvifor fungerte det ikkje i Rosenborg? spør Davy.

Davy meiner Horneland ikkje er ein gjest frå «ei anna verd», men at jobben han gjer i Brann har relevans for lokalfotballen bak Brann på fleire måtar.

– Det eine er spørsmål om kor godt han følgjer med i lokalfotballen, og kva han ser etter hos spelarar.

– Det andre er korleis han ser potensial i spelarar som frå før er etablert i Eliteserien, men som for tida ikkje blomstrar. Vi har sett det med fleire signeringar, spelarar som ikkje får tillitt, eller ikkje presterer for andre klubbar, så kjem dei til Brann og blir nøkkelspelarar.

– Eg vil veta korleis han får dette til!