Høg flo gjorde ingen skade - til no
Stor bildeserie: Sånn såg floa ut i Os hamn, Øyane og Ervikane. Os brannvesen åtvarar båteigarar, og brukarar.
Bildeserie:
Det var meldt ekstremt høg vasstand på Vestlandet i dag, og klokka 10.21 skulle det vera full flo i Os.
• Vatnet sto høgt allereie ein god time før full flo
Det blei ikkje så ekstremt som venta, ifølgje BT.no var vasstanden 10 cm lågare enn det som var meldt, ifølgje Kartverket blei den 1,87 meter, altså 12 cm lågare enn varsla.
I Os hamn var det dessutan blikkstille, grunna vindretning frå vest, noko som var med på å gjera at den høge fjorden ikkje herja noko særleg med hamna.
– Vi førebudde oss på å pumpa ein kjellar i ein privat bustad ved elva, eit hus som plar får problem når vasstanden er svært høg, men der gjekk det bra, fortel Terje Håvardstun frå Os brannvesen.
Brannvesenet hadde ingen rednings- eller pumpeoppdrag i samband med den høge vasstanden.
– Pass opp for rekve!
Ansvarleg for Os hamn, Gitle Smaadal frå Os brannvesen, var òg på patrulje i hamna i 10-tida i dag.
– Alt ser ut til å ha gått greit, men det vi veit av erfaring er at det ved høg vasstand ofte kjem mykje på rek, seier Smaadal, og peiker på ein kort tømmerstokk på rek ved Os kai.
– Dei som bruker båt no om vinteren bør vera obs på at det kan ligga tunge ting å duppa i vasskorpa. Stokkar som denne kan gjera stor skade på ein båt i fart.
I bildeserien over ser du Os hamn på full flo, Øyane og Ervikane.
Takk til lesarar som har sendt oss bilde!