– Her skal det vera lett å finna fram
Midtsiden har vore på omvising hos Bygger'n ei veke før opning.
Bildeserie:
I neste veke opna Bygger'n i Os igjen. Det nybygde varehuset i Industrivegen er for lengst ferdig, no blir det jobba for fullt med å setja varer på plass.
Les òg: Hodneland sjef når Bygger'n gjer comeback i Os
– Utstillingar skal byggast, vi skal skilta godt og vi har framleis ledige hyller som skal fyllast med varer, seier kjededirektør Christine Holm.
Ho besøker Os i dag og skal tilbake både på VIP-opninga i neste veke og den offisielle opninga dagen etter.
– Vi kan bli mellom 100 og 200 gjestar kvelden før opning. Då blir det tapas og underhaldning med Marit Voldsæter, så det gler vi oss skikkeleg til.
– Ei glede å bygga frå scratch
På den 4,9 mål store tomta har EA Smith bygd eit 1300 kvadratmeter stort byggevarehus.
– Dette er delt inn i varm sone på 400 kvadratmeter og kald sone på 900 kvadratmeter. Vi er ikkje opptatt av å ha det største varehuset, men vi vil vera kompakt og ryddig. Det skal vera lett å finna fram og du skal få hjelp av fagfolk.
Blant dei tilsette er det både tømrarar, tidlegare snekkarar og folk med lang fartstid i byggevarehus på Aust- og Vestlandet.
– Det har vore ei glede å bygga frå scratch, eg føler vi har fått mykje ut av både tomta og bygget.
I dag fekk Midtsiden ei omvising i både varm og kald sone, der det er høg aktivitet med bygging av dei siste utstillingane og plassering av varer i små og store hyller.