Hodneland sjef når Bygger’n gjer comeback i Os
Bygger’n er nøgd med både byggeprosess og bemanning i ny butikk. No er opningsdatoen òg klar.
Det har sett klart ut lenge på den ryddige byggeplassen i Industrivegen, men framleis gjenstår nokre detaljar og enkelte varer i nye Bygger’n i Industrivegen.
– Vi tjuvstartar med VIP-kveld for klubbkundar og proffkundar onsdag 20. april, torsdag 21. april blir sjølve opningsdagen, fortel kjededirektør Christine Holm til Midtsiden.
Den 4,9 mål store tomta har fått butikk, trelast og parkeringsplass, og har separat inn- og utkøyring for praktisk og trygg gjennomkøyring i den kalde delen av butikken, eller rundt bygget.
Fekk gamlesjefen tilbake
Som leiar i nye Bygger’n Os har kjeda fått Eivind Hodneland. Hodneland hadde lang fartstid hos førre Bygger’n i Os, dei siste 10 åra som dagleg leiar. Han gjekk vidare til jobb som regionsjef for Bygger’n Norge.
– Vi hadde bra med søkjarar og mange av dei var godt kvalifiserte. Men Hodneland kan visa til tidligere god vekst og gode resultater, han har vist at han kan driva Bygger’n-butikk.
– Vi er glade for at han ønskja seg tilbake til bransjen, både grunna erfaringa hans og dei relasjonane han har i marknaden.
Hadde fire fine år på golfbanen
Etter to år som regionsjef i Bygger’n, med kontor i Rådal og mange reisedøgn, ville Eivind jobba nærmare heimen i Os. Som ihuga golfspelar søkte han seg til ledig leiarstilling i klubben på Hauge.
– Det blei fire fine år, men då Bygger’n skulle tilbake til Os var eg klar for å koma tilbake til bransjen. Det er spesielt kjekt å vera med på ein butikk som blir bygd frå scratch, og eg ser fram til å driva ein topp moderne byggevareforretning, seier Eivind.
– Eg har eit aldri så lite konkurranseinstinkt, så det skal bli spennande å bryna seg på andre byggevarehus i og rundt Os. Det kjem til å bli mykje byggeaktivitet i bygda også i åra som kjem, så det er nok plass til oss alle.
Grunnbemanninga ved Bygger’n vil i starten bestå av seks faste tilsette. Alle er på plass og den nye leiaren var med på tilsetjingsprosessen.
– Det er eit veldig fint lag eg får med meg, både når det kjem til fagleg kompetanse og kjemi oss imellom. Når vi har det bra så har kundane det bra, seier Eivind Hodneland, drygt to veker før opning.