Havnechefen tar pause

For to år sidan blei kafeen Engeline overtatt av nye drivarar. Reidun Vasby og sonen Frank Vasby Bruarøy fortel om godt besøk og hyggelege kundar, men at dei har valt å ikkje fornya leigekontrakten som går ut i februar.

– For å driva vidare ser vi at det bør investerast. Vi betaler allereie ei høg leige, og i tilbodet om ny leigekontrakt går utgiftene ein del opp. Havnechefen har aldri gått betre, vi har mykje besøk på dagtid og stadig fleire middagsgjestar på kveldstid. Men vi vågar ikkje å ta den risikoen, det er ein tøff bransje og fleire nyetableringer på gang.

– Det er dessutan fleire faktorar som speler inn. Kommunen skal bygga glasbygg på Torget, med servering, der kunne vi godt tenkja oss å koma i dialog og eventuell leige. I tillegg har mannen min eit prosjekt på gang aust om elva, nær Osbrua, på ei tomt vi ønskjer å bygga eit næringsbygg med restaurantlokale. Søknadsprosessen er i gang, men der er vi framleis i ein tidleg fase.

Huseigar pussar opp

Bygget i Brugata, tidlegare kalla Buggegården, fekk i september ny eigar.

Borghild Strønen, som starta Engeline saman med søstera i 2011, har saman med mannen Oddvar Onstad kjøpt bygget.

– Vi held på å pussa opp husværa oppover i etasjane, fortel Oddvar.

Bygget har fire husvære i 2. etasje, to i 3. etasje og éin i 4. etasje.

Alt er ikkje klart med langtidsplanane enno, men kafeen blir ikkje stengt i mars.

– Det blir gjerne eit par endringar, kanskje også eit par dagar stengt mens vi gjer nokre små grep, men vi kjem til å driva kafeen vidare frå mars av, fortel Onstad.

Havnechefen vil satsa vidare

Sjølv om både Torget og eit komande nybygg står for tur er Havnechefen-gjengen klare for å opna ein annan stad snarast råd, om dei finn rett lokale.

– Vi har hatt ei strålande tid med gode kundar og fine tilbakemeldingar. Dei tilsette blei varsla onsdag og i dag, men vi har òg sagt at vi kan koma til å opna igjen ein annan stad i sentrumskjerna om vi finn eit godt eigna lokale.

– Eg vil og prøva å hjelpa dei som har bestilt konfirmasjon hos oss til å finna ei løysing.

Havnechefen driv restauranten ut februar. I tida fram til dei opnar igjen ein annan stad vil kokken Frank driva som frilans.

– Eg har allereie booka inn både bryllaup og 40-årsdag, og kjem til å retta meg mot både private og bedrifter, seier Bruarøy.