– Har vore eit vanskeleg val

Tidlegare denne uka kom annonsa om at Amfi Os søkte etter ny senterleiar.

– Det har vore eit ufatterleg vanskeleg val. Jobben som senterleiar er veldig interresant og ein jobb eg har stortrivdes i. Men samstundes tek den mykje tid.

– Eg var vel kome til ein stad i livet der eg ønska å bruke meir tid på familien og borna på fire og snart ni år, fortel Anne Kristine Tøsdal når Midtsiden spør om kva som er årsaka til at ho seier seg opp.

– Har tatt eit verdival

Som eit bilete på det heile fortel Tøsdal at ho no gler seg til jul og å kunne baka pepparkaker saman med dei to borna.

– Eg kjøpte eit pepparkakehus før jul i fjor. Det monterte vi, knuste og åt no ein dag i juli. Det skal bli kjekt å få gjera det rundt jul dette året.

– Men eg legg ikkje skjul på at det er rart å ha sagt opp. Eg har gått mange rundar med meg sjølv før eg tok skrittet og leverte oppseiinga. Det føles framleis rart og eg er litt forundra sjølv, men eg har konkludert med at det er eit verdival eg har tatt. Så får eg sjå om eg finn meg noko nytt å gjera. Håpet er å finna ei 50 % stilling som gjer at eg kan vera meir med dei heime, seier Tøsdal.

Stolt over senteret

Tøsdal har jobba på senteret i 10 år, åtte av dei som senterleiar.

– Eg har jo tre månaders oppseiingstid, så no skal eg legga til rette for den som kjem etter meg. Eg er glad og stolt over å kunne levera eit senter som går så det susar og kor vi har oppgradert mykje dei siste åra.

– Det er eit ryddig system etterfølgaren min kjem inn i. Både Thon gruppen og Amfi-kjeda har gode og ryddige rutinar som det ikkje skal vera så vanskeleg å setta seg inn i.

Har vore variert

Når vi ber ho skildra kva jobben har gått ut på dei siste ti åra veit ho nesten ikkje kor ho skal byrja.

– Det er ein utruleg variert og spennande jobb. Du veit aldri kva dagen bringer. Plutseleg må du ta hand om ein laus hund som har forvilla seg inn i senteret eller ein unge som har mista foreldra sine. I neste augeblikk sit du med budsjetta og ser på korleis du kan hjelpa butikkane til å løfte omsetninga og skape god stemning på senteret.

– Eg liker folk veldig godt. Det å ha kontakt med kundar, leverandørar, klovnar, korps og ikkje minst dei tilsette og eigarane av butikkane er noko av det som har vore det aller kjekkaste i jobben som senterleiar. Det blir litt rart å ikkje skulle ha det på same måte vidare, avsluttar Anne Kristine Tøsdal.