– Har vi noko vi skulle ha sagt?

Statens vegvesen jobbar med planlegging av ferjefri veg frå Kristiansand til Trondheim. Mellom Stord og Bergen er det to alternativ, midtre alternativ med bru frå Reksteren til Os blir stadig meir aktuell.

I den samanhengen har Glenn Erik Haugland (V) fleire spørsmål han håper på å få svar på under folkemøtet han sjølv har tatt initiativ til.

– Eg blei valt inn som vara i kommunestyret mykje på grunn av at folk veit at eg er imot midtre trasé. Sjølv om eg bur ved Halhjemsvegen og kan bli råka av utviding av denne, følte eg at eg måtte ta ordet og engasjera meg, seier komponisten og lokalpolitikaren til Midtsiden.no.

Ved sidan av å ha skrive lesarbrev til fleire aviser har han engasjert seg med eigen blogg om saka.

– Kva er hovudårsaka til at du er imot brua?

– Det er fordi så mange blir råka. Det er ingen andre stadar mellom Stavanger og Bergen at det er så tett med innbyggarar langs det som kan bli ein kraftig utvida veg.

No inviterer han og resten av Os Venstre til folkemøte med paneldebatt.

Folkemøte i Øyane

Møtet er i Vårvon, ungdomshuset i Søre Øyane,torsdag 4. oktober klokka 19.

Prosjektleiar frå Statens vegvesen, Signe Eikenes, kjem for å informera.

I panelet sit Terje Søviknes (ordførar i Os), Hans Vindenes (ordførar i Fusa), Jon Lund frå næringslivet på Stord, Glenn Erik Haugland (Os Venstre, nabo til E39 på Søre Neset) og Marie Bruarøy (Os Høgre, permittert varaordførar frå Søre Øyane).

Vil ha engasjement

– Hovudmålet med møtet er å få folk til å tenkja sjølv. Prosjektet er stort og Os blir ramma, vi kan ikkje gjera som for 40 år sidan, sitja stille eller legga oss på rygg. Då Halhjemsvegen blei bygd sat folk og gret på gardane sine.

– Det blei det snakka flott om nye arbeidsplassar, det einaste som har skjedd er at butikken og posten har blitt lagt ned, Søre Neset står igjen som gjennomfartsåre.

– Snakkar Søviknes med fleirtalet si stemme?

Blant det Haugland er mest nysgjerrig på er om osingane sine meiningar blir høyrt.

– På møtet håper eg både å få innsikt i status for prosjektet, men også i kva vår stemme betyr.

"Om eit år eller to kan vedtaket bli fatta. Innan den tid bør vi i Os seia kva vi meiner" sa ordførar Terje Søviknes under eit møte med næringslivet i Os i Oseana i mars i år.

– Sidan har det ikkje skjedd noko initiativ til å lodda stemninga. Søviknes har snakka med si stemme inn mot sentrale organ, men er det Os si stemme? Kva er stemninga i Os, vil alle ha vegen, eller berre Frp? undrast Haugland.

Om saka:

Statens vegvesen tilrår i rapport frå 2011 å arbeida vidare med to konsept:

1. Ei midtre linje over Tysnes/Reksteren, med bru over Langenuen til Tysnes og vidare brusamband over Bjørnefjorden. Som eit første byggjesteg kan ein ha ei ferje frå Rekstern/Tysnes til Os. Frå Aksdal til Stord blir det lagt opp til utbetring av vegen til 2- og 3-feltsveg med midtdelar.

2. Ein indre trasé gjennom Fusa. Utbetring av vegen mellom Aksdal og Stord som over. Vidare frå Stord er det skissert bru over Langenuen og veg/tunnel på austsida av Tysnes til Stussvik og Sundvor. Vidare frå der via Eikelandsosen og Bogsøy til Os; det vil seie kryssing av Ådlandsfjorden og Samnangerfjorden.

Les òg:
– Minst mogleg konflikt
KS1: Det er best å kryssa fjorden
Må brua landa i Øyane?