– Han må våga å gå fort
Sverre tok nok ein 3. plass i EM og er klar for 10.000-meteren søndag. – Han veit kor godt han toler distansen, i morgon må han våga å gå fort, seier pappa Jarle.
Fredag gjekk Sverre sesongbeste på 500 meter og tok 3. plass på 5000 meter. Med det er han også blant dei 8 som får gå 10.000 meter søndag.
I morgon, som tredje par ut, kjempar Sverre Lunde Pedersen og Håvard Bøkko om pallplass i EM i allround.
– Nederlendarane går i siste par, så dei har vi ikkje kontroll på. Men Sverre og Håvard skal gå så langt dei kan saman, så dei hjelper kvarandre til å gå så fort at nederlendarane får problem, seier landslagstrenar Jarle Pedersen til Midtsiden.no.
– Kanskje får vi begge på pallen. Kven som er sterkast får dei to finna ut av i løpet av distansen, men i starten går dei saman.
Sven Kramer si leiing er det truleg lite å gjera med, men Jan Blokhuijsen er berre eitt sekund framfor Sverre i samandraget. Bøkko ligg på 2.plass, framfor Blokhuijsen, tre sekund framfor Sverre.
Men Sverre kan slå Bøkko igjen, som han nyleg gjorde i NM, då med nettopp tre sekund.
– Når du går 10.000 meter kan du ikkje la distansen ta deg, du må vera offensiv. Det er lettare når du har gått distansen nokre gongar, og veit kva du har inne. Og Sverre har eit større potensiale enn det han har tatt ut tidlegare.
Søndag blir det frukost og ein tur til banen på formiddag, for å testa isen. Så blir det tilbake til hotellet for lunsj, avslapping og litt mental førebuing.
– Dei er nok på banen igjen rundt ein time før start. Sverre og Håvard går klokka 15.50, fortel Pedersen.