Godt møte med Os

Denne veka blei det kjent at Os hentar tre utanlandske spelarar med fartstid med ungdomslandslag og høgare divisjonar i Slovakia, for prøvespel på Kuventræ.

I går hadde dei si første trening med Os, men først fekk dei ein runde i bygda med supportar og gutar 13-trenar Robert Nøss.

– Vi har vore i Os sentrum, på Solstrand, Oseana, utom klosteret og Ole B – og så sparte eg det beste til slutt, seier Robert på plass på kaien utanfor Vedholmen Landhandel i Øyane.

– Godt førsteinntrykk

Ingen av dei tre spelarane frå Slovakia kjenner kvarandre frå før. Dei er heller ikkje frå same by.

Andrej Nemec (22) er frå Zarnovica, 15 mil aust for hovudstaden Bratislava. Lukáš Horváth (26) er frå Presov, 25 mil lengre aust.

– Vi har ikkje vore i Noreg før, men har høyrd mykje bra om landet og fått eit veldig godt førsteinntrykk av Os, seier Andrej på vegne av seg sjølv og Lukas.

Patrik Bujna (28) frå Nové Zámky, som ligg midt mellom Bratislava og Budapest, har nemleg vore i Noreg før. Dei tre siste månadane har han budd og jobba på Hitra.

Håper å bli verande

Midtbanespelar Nemec har vakse opp i klubben FK Dukla Banská Bystrica og spelte i år for den tyske 3. divisjonsklubben Nordhausen.

– Eg håper eg får vist meg fram i Os og kanskje seinare også i høgare divisjonar i Noreg. Eg er veldig motivert for dette, seier han.

Forsvarskjempen Horvath, som er 194 centimeter høg, kjem frå FK Lokomotiva.

– Vi er spente no, på møtet med Os og dei andre spelarane og på om vi kan slå oss ned i Os med spelekontrakt og jobb. Vi kan ta kva jobb som helst, seier han.

Den raske angrepsspelaren Bujna seier han ikkje har spelt kampar i haust, men at han har halde formen og fått trent godt på Hitra.

Dei tre blir i Os til tysdag og skal trena på Kuventræ også søndag og måndag før det blir avgjort om dei kjem tilbake som Os-spelarar i januar.