God interesse for Sverre-tur til Inzell

I november tok Os Travel initiativ til ein pakketur til Salzburg for å sjå Sverre Lunde Pedersen og resten av det norske landslaget går VM i Inzell.

– Målet var å samla minst 20 osingar, sjølv om vi var seint ut og fleire osingar allereie hadde booka seg tur.

– Responsen var god, vi passerte 10 etter eit par veker, og kom opp i 21 påmeldte, fortel Hans Parnefält.

Men to små reisefølgje måtte dessverre melda avbod, mengda påmeldte er no nede i 13.

Livleg reisefølgje

– Eg har halde på 7 billettar, og sit på desse fram til søndag. Det er framleis ledige plassar på flyet, så det er kanskje mogleg å booka fleire seinare, men dei som vil ha tur til prisen som først var annonsert bør hiva seg rundt no i helga.

11 av dei 13 som har booka tur er frå Os, dei to andre er frå Fana.

– Fleire av dei som har vist interesse, men førebels ikkje har bestilt, har prøvd å få med ein venegjeng utan å lykkast. Dette meiner eg likevel er ein tur du fint kan melda deg på som singel eller par, dei som er påmeldt til no er stort sett osingar i alderen 40 pluss. Det er nok fleire som kjenner kvarandre frå før. I tillegg møter vi 10-15 andre osingar i Inzell, og skal nok få det kjekt saman.

Utanom super-supporter Tore Kleppe er revyveteran Otto Hægland med på turen.

– Vi skal nok få det veldig kjekt anten vi blir 13 eller 20. Om du vil ta éin dag i skøytehall og éin dag med shopping eller ski, er dette samtidig ein god pakketur. Salzburg, Mozarts fødeby, er verdt eit besøk i seg sjølv, meiner reiseveteranen, på veg til å vera skøytepublikum for første gong.